Ўзбекистонда шу вақтгача 328 нафар болада коронавирус аниқланган. Бу ҳақда соғлиқни сақлаш вазири ўринбосари Элмира Боситхонова АОКА ҳузурида ўтказилган матбуот анжуманида маълум қилди.
«Бугунги кунгача 45 мингдан ортиқ болаларимиз карантинда бўлди. 328 нафар бола эса афсуски, коронавирус билан касалланди. Мана вазият қандай жиддий», — деди Боситхонова.
Аввалроқ Боситхонова карантин даврида 208 нафар ҳомиладор аёлда коронавирус аниқлангани ҳақида маълум қилди.
Эслатиб ўтамиз, 10 июлдан Ўзбекистонда карантин чоралари кучайтирилмоқда. Унга кўра, ташкилий-ҳуқуқий ва мулкчилик шаклидан қатъи назар, мактабгача таълим ташкилотлари, ўқув курслари ва ҳар қандай тўгараклар фаолияти ҳам тўхтатилиши белгиланган.
Маълумот учун, Ўзбекистонда 8 июль соат 10:00 ҳолатига кўра, коронавирус билан касалланганларнинг умумий сони 10 982 кишига етди. Улардан 42 нафари вафот этган, 6811 нафари эса соғайди.
Изоҳ (0)