Ўзбекистон Президенти Шавкат Мирзиёевнинг Россия пойтахти Москва шаҳрига амалий ташрифи дастурида кўзда тутилган тадбирлар якунланди. Шавкат Мирзиёев Москвадан Тошкентга йўл олди. Бу ҳақда Президент матбуот хизмати хабар берди.
Ўзбекистон Президенти Шавкат Мирзиёев Россия президенти Владимир Путиннинг таклифига биноан, Иккинчи жаҳон урушида қозонилган ғалабанинг 75 йиллиги муносабати билан Москвада ўтказилган Ғалаба парадида қатнашиш учун 23 июнь, сешанба куни Москвага етиб борди.
Шу куни Шавкат Мирзиёев Россия президенти Владимир Путин билан учрашди. Россия президенти Ғалаба парадига келгани учун Шавкат Мирзиёевга миннатдорлик билдирди. Шавкат Мирзиёев ҳамда Россия президенти Владимир Путин суҳбат чоғида стратегик шериклик ва кўп қиррали ҳамкорлик муносабатларини янада мустаҳкамлаш масалаларини муҳокама қилди.
Шавкат Мирзиёев 24 июнь куни Москвадаги Қизил майдонга ташриф буюрди ҳамда Россия президенти ва бир қатор МДҲ давлатлари раҳбарлари билан бирга Ғалаба парадида иштирок этди. Ўзбекистон ҳарбийлари ҳам мазкур тадбирда мамлакат мустақилликка эришганидан кейин биринчи бор қатнашди ва чиқиш қилди.
Шунингдек, Шавкат Мирзиёев 24 июнь куни бошқа давлат раҳбарлари билан бирга Москвадаги «Номаълум аскар» ёдгорлигига гул қўйди.
Шундан сўнг Шавкат Мирзиёев Москвадаги Ислом Каримов хиёбонига ташриф буюрди, Биринчи Президент хотирасига ҳурмат бажо келтириб, ҳайкал пойига гул қўйди. Хиёбондан чиқишда Президент шу ерда тўпланган ўзбекистонликлар билан саломлашди.
Маълумот учун, Владимир Путин Москвада ўтган Ғалаба парадига барча МДҲ давлатлари раҳбарларини таклиф қилган. Озарбайжон президенти Илҳом Алиев, Арманистон бош вазири Никол Пашинян мамлакатларидаги эпидемиологик вазият туфайли, Туркманистон президент Гурбангули Бердимуҳамедов 29 июнда 63 ёш — Пайғамбар ёшига тўлиши сабаб тантанали тадбирларга бора олмаслигини эълон қилган. Қозоғистоннинг биринчи президенти Нурсултон Назарбоев эса коронавирус юқтириб олган ва у ҳам Москвага бормаган.
Мазкур парадда иштирок этиш учун Москвага борган Сўронбой Жээнбеков раҳбарлигидаги Қирғизистон делегацияси аъзолари орасида коронавирус аниқланди. Шу сабабли Қирғизистон президенти Сўронбой Жээнбеков ҳам парадда иштирок этмади.
Изоҳ (0)