Украинанинг 2016 йилда асос солинган SkyUp Airlines лоукостер авиакомпанияси Ўзбекистонга парвозларни амалга ошириш учун ариза берди. Бу ҳақда Украина давлат авиация хизмати маълумотларига таяниб, Spot хабар берди.
Компаниянинг аризасига кўра, у 2020 йил 1 июлдан бошлаб чекланмаган муддатга парвозларни амалга ошириш ҳуқуқини беришни сўрамоқда. Компания Тошкент ва Киев ўртасида ҳафтасига икки марта парвоз қилиш истагини билдирган. Украина давлат авиация хизмати мазкур масалани 26 июнь куни кўриб чиқади.
«Ўзбекистон ҳаво йўллари» Тошкент—Киев—Тошкент йўналишида парвозларни амалга оширишни 2015 йилнинг май ойида тўхтатган, ўша йилнинг сентябрь ойида эса Украина пойтахтидаги офисини ёпган.
Ўшанда «Украина халқаро авиалиниялари» компанияси ҳам мазкур йўналишдаги парвозларини тўхтатган — можаро Украина авиакомпаниясининг эҳтимолий устунлигидан келиб чиққан, у Бориспол аэропорти орқали амалга ошириладиган транзит ёрдамида йўловчи оқимининг бир қисмини олиб қўйган.
Ўзбекистон Украина компаниясидан парвозлар частотасини ҳафтасига иккитадан биттага камайтиришни талаб қилган, бунинг оқибатида «Украина халқаро авиалиниялари»нинг транзит модели самарали ишлашдан тўхташи мумкин эди. «Украина халқаро авиалиниялари» парвозлар частотасини камайтиришга рози бўлмаган, бунинг оқибатида икки мамлакат ўртасидаги тўғридан-тўғри авиақатновлар тўхтатилган.
2017 йилнинг декабрь ойи охирида икки мамлакат авиация идоралари протокол имзолагани ва яқин вақт ичида тўғридан-тўғри рейс йўлга қўйилиши ҳақида маълумот пайдо бўлди. Бироқ Ўзбекистон томонлар ўртасида ҳал қилинмаган масалалар борлигини маълум қилди.
Эслатиб ўтамиз, Ўзбекистон коронавирус пандемияси сабабли тўхтаб қолган халқаро авиқатновларини 15 июндан бошлаб «қизил», «сариқ» ва «яшил» рейслар принципи асосида қайта тиклади.
Шунингдек, Жанубий Кореянинг Asiana Airlines компанияси июнь июль ойларида Ўзбекистонга бир нечта рейсларни амалга оширишни режалаштирмоқда. Туркиянинг Turkish Airlines халқаро авиакомпанияси Истанбул—Тошкент авиарейслари 1 июлдан қайта йўлга қўйилишини маълум қилди.
Бундан ташқари, Тожикистон 1 июлдан бошлаб Ўзбекистон билан халқаро авиақатновларни қайта тиклайди. Россия ва Ўзбекистон ўртасидаги доимий авиақатновлар 15 июлдан тикланиши кутилмоқда.
Изоҳ (0)