Сурхондарё вилояти Денов тумани ҳокими Бахтиёр Ибатов 21 июнь куни туман аҳолисига мурожаат қилиб, туманнинг бир фуқароси 20 июнь куни коронавирусдан вафот этганини маълум қилди. Бу ҳақда «Kun.uz» хабар берди.
Туман ҳокими ўз мурожаатида бир фуқаронинг коронавирусдан вафот этганини маълум қилиб, деновликларни коронавирус инфекциясидан сақланиш учун ўрнатилган талабларга риоя қилишга чақирган.
Ҳокимнинг айтишича, коронавирусдан вафот этган марҳум билан мулоқотда бўлган 187 нафар фуқаро карантинга олинган. Уларнинг 6 нафарида COVID-19 касаллиги аниқланган, яна бир неча фуқаро касалликда гумон қилинмоқда.
«Kun.uz»нинг ёзишича, ушбу видеолавҳа Денов тумани ҳокимлигининг Telegram’даги каналида эълон қилиниб, сўнгра ўчириб ташланган.
Нашр мазкур масала юзасидан Соғлиқни сақлаш вазирининг матбуот котиби, жамоатчилик билан алоқалар бўлими раҳбари Фурқат Санаев билан боғланган. Вазирлик вакили эса бу маълумотни тасдиқламаган.
Ўзбекистонда коронавирус билан боғлиқ ҳозирча сўнгги бўлиб турган 19-ўлим ҳолати 10 июнь куни қайд этилганди.
Соғлиқни сақлаш вазирлиги 20 ва 21 июнь кунлари Сурхондарё вилоятида коронавирусга чалиниш бўйича янги ҳолатлар аниқлангани ҳақида хабар бермаган. Вазирлик Сурхондарёда коронавирус аниқлангани ҳақида сўнгги марта 17 июнь куни хабар берганди.
Аввалроқ Китоб туманида коронавирус билан касалланганлик бўйича гумонланган фуқаро вафот этганди. Соғлиқни сақлаш вазирлиги эса вафот этган фуқаронинг ўлимига коронавирус сабаб бўлмаганини маълум қилганди. Мазкур фуқаронинг ўлимидан сўнг Китоб тумани ҳудуди тўлиқ карантинга ёпилганди.
