Ўзбекистоннинг ташқи савдо айланмаси 2020 йилнинг январь—май ойлари давомида 12,9 миллиард долларни ташкил этиб, 2019 йилнинг мос даврига нисбатан 2,4 миллиард долларга ёки 15,9 фоизга камайди. Бу ҳақда Давлат статистика қўмитаси ҳисоботида маълум қилинди.
Ҳисоботга кўра, жорий йилнинг беш ойида ташқи савдо айланмасида экспорт ҳажми 5,1 миллиард долларга тенг бўлган ва ўтган йилнинг мос даврига нисбатан 15,6 фоизга камайган. Импорт ҳажми 7,8 миллиард долларни ташкил қилган бўлиб, 2019 йилнинг мос даврига нисбатан пасайиш 16,1 фоизни ташкил қилган. Ҳисобот даврида 2,6 миллиард доллар қийматида пассив ташқи савдо баланси юзага келган.
Қайд этилишича, Ўзбекистон жаҳоннинг 150 дан ортиқ мамлакати билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссаси Хитой (17,9 фоиз), Россия (16,9 фоиз), Қозоғистон (8,4 фоиз), Жанубий Корея (7,3 фоиз), Туркия (5,5 фоиз), Қирғизистон (2,3 фоиз) ва Афғонистон (2,0 фоиз) давлатларининг улушларига тўғри келмоқда.
Қўмита томонидан маълум қилинишича, ташқи иқтисодий фаолият бўйича 20 та йирик ҳамкор-давлат орасидан бешта давлатда актив ташқи савдо баланси кузатилган. Улар қаторидан Афғонистон (263,2 миллион доллар), Қирғизистон (211,2 миллион доллар), Тожикистон (117,8 миллион доллар), Франция (27,1 миллион доллар) ва Эрон (7,9 миллион доллар) ўрин олган. Қолган 15 та давлатлар билан пассив ташқи савдо баланси сақланиб қолмоқда.
Мавзуга доир:
- Ўзбекистонда 2020 йилнинг 5 ойида 31,5 трлн сўмлик қурилиш ишлари бажарилди
- Ўзбекистонда январь—май ойларида автомобиль ишлаб чиқариш ҳажми ошгани маълум бўлди
- Ўзбекистонда январь—май ойларида қанча бензин ишлаб чиқарилгани маълум қилинди
- Ўзбекистон 2020 йилнинг 5 ойида ўтган йилнинг мос даврига нисбатан 2 баравар кўп гилос экспорт қилди
Изоҳ (0)