Сардобада юз берган тошқинда аҳолини эвакуация қилиш вақтида сувда оқиб кетиб, бедарак йўқолган Миллий гвардия ходими Қозоғистонда қидирилмоқда. Бу ҳақда Чимкент шаҳар фавқулодда вазиятлар департаментига таяниб, «Kazinform» хабар берди.
Маълум қилинишича, Қозоғистоннинг Туркистон вилояти Мақтаарал туманида сув тошқини пайтида бедарак йўқолган ўзбекистонлик аскар қидирилмоқда.
Чимкент фавқулодда вазиятлар департаменти матбуот хизматининг хабар беришича, 20 июнь куни қутқарув гуруҳи аъзолари қўшни давлатдан келган аскарни қидиришга киришган.
Фавқулодда вазиятлар департаменти хабарига кўра, 20 июнь куни Фавқулодда вазиятлар қўмитаси раҳбариятидан Ўзбекистон Республикаси Миллий гвардиясининг 1992 йилда туғилган ҳарбий хизматчисини қидиришда ёрдам бериш тўғрисида хат келиб тушган. Мактубга кўра, «Шардара» қутқарув станциясидан 5 нафар қутқарувчи, битта транспорт воситаси ва битта қайиқ Мақтаарал ва Еттисой туманларининг сув тошқини бўлган ҳудудлари ва сув омборларида қидирув ишларини олиб бориш учун жўнаб кетган. Қидирувга қутқарув отрядининг икки нафар кинологи ҳам жалб қилинган.
Эслатиб ўтамиз, Сардобадаги фалокат вақтида аҳолини қутқараётган Миллий гвардиянинг уч ходими оқиб кетганди.
Аҳолини эвакуация қилиш тадбирлари вақтида Сирдарё вилоятида жойлашган ҳарбий қисм махсус вазифаларни бажарувчи отряд гуруҳ командири, капитан Санжар Ибрагимов, махсус вазифаларни бажарувчи отряд гуруҳ мутахассиси, оддий аскар Ҳазрат Суюнов, жанговар отряд муҳандис-сапёр гуруҳи мутахассиси, учинчи даражали сержант Ҳусниддин Суяров сув тошқинида оқиб кетган.
Қидирув натижасига кўра, капитан Ибрагимов ҳодиса жойидан 15 километр узоқликдаги масофада соғ ҳолда топилган. Учинчи даражали сержант Суяровнинг жасади 3 май куни соат 08:00 ларда Сирдарё вилояти Оқолтин туманидаги Аҳиллик қишлоғи «Кичик Бобур» маҳалласидан топилган. Оддий аскар Ҳазрат Суюновни қидириш бўйича ишлар давом этаётгани айтилганди.
Шунингдек, Сардобадаги фалокат оқибатида 6 киши вафот этгани маълум қилинган.
Изоҳ (0)