Rossiyada Ikkinchi jahon urushida Germaniya ustidan qozonilgan g‘alabaning 75 yilligiga bag‘ishlangan harbiy parad 24-iyunda bo‘lib o‘tadi. Bu haqda prezident Valdimir Putin “Rossiya 24” telekanali efirida ma’lum qilgan, deb yozmoqda “RBK”.
“Ikkinchi jahon urushida fashizm ustidan qozonilgan g‘alabaning 75 yilligiga bag‘ishlangan harbiy paradni poytaxt Moskva va boshqa shaharlarda o‘tkazish tadbirlariga tayyorgarlik ko‘rishni buyuraman. Tadbirlar 24-iyunda o‘tkaziladi”, — degan Putin.
Shuningdek, u paradga tayyorgarlik ko‘rish va uni o‘tkazishda xavfsizlik talablariga qat’iy rioya etish haqida ham ko‘rsatma bergan.
“Tadbirlarda ishtirok etadigan odamlarning xavfsizligini ta’minlash yuqori darajada bo‘lishi lozim”, — degan Rossiya prezidenti.
Putin 16-aprelda koroanvirus tarqalishi bilan bog‘liq vaziyat sabab 9-mayda o‘tishi lozim bo‘lgan G‘alaba paradining o‘tkazilishini kechiktirgan, biroq tadbirlarning qaysi sanada o‘tishiga aniqlik kiritmagandi. Kremldagi “RBK” manbalarining xabar qilishicha, paradning avval boshidan 24-iyunda o‘tishi taxmin qilingan. Sababi 1945-yilda Qizil maydondagi birinchi harbiy parad ham ayna shu sanada o‘tkazilgan.
Prezident administratsiyasidagi amaldorlardan biri karantindan keyin paradning o‘tkazilishi xalqni ruhlantirishi lozimligini qayd etgan.
“RBK”ning qayd etishicha, 24-iyunda nafaqat parad, balki Konstitutsiyaga o‘zgartirish kiritish bo‘yicha ovoz berish jarayoni ham o‘tkazilishi mumkin. Ushbu sana dam olish kuni deb e’lon qilingan, odamlar paradni tomosha qilishi va ovoz berishi mumkin. 24-iyunda faqat parad o‘tkazilsa va ish kuni davom etsa, odamlar bayram shukuhini his qilmasligi mumkin va hamma ham televizor orqali to‘g‘ridan to‘g‘ri translyatsiyani ko‘ra olmaydi.
Konstitutsiyaga o‘zgartirish kiritish yuzasidan referendum 22-aprelda o‘tishi lozim edi, ammo u ham koronavirus epidemiyasi tufayli boshqa kunga qoldirilgan. Ushbu tadbirning qachon o‘tkazilishi borasida ham aniq ma’lumot berilmagan.
9-may kuni Moskva va boshqa shaharlarda bayram mushakbozliklari o‘tkazilgan. Shuningdek, Rossiya poytaxtida havoda harbiy parad bo‘lib o‘tgan. Rossiyada G‘alaba paradining o‘tkazilishi Sobiq Ittiffoq parchalanganidan keyin 1995-yilda Boris Yeltsin prezidentligi davrida boshlangan va shundan beri har yili o‘tkazib kelinmoqda.
Izoh (0)