Буюк Британияда изоляция режими вақтида камида 90 та мобил алоқа минорасига ҳужум уюштирилган. Бу ҳақда MobileUK мобил алоқа операторлари ассоциациясига таяниб, The Mirror хабар берди.
Таъкидланишича, фитна назариясининг маҳаллий тарафдорлари 5G алоқа минораларини ишдан чиқаришга ҳаракат қилган. Уларнинг фикрича, бу миноралар коронавирус тарқалишига хизмат қилади. Бунда зарар кўрган минораларнинг бир қисмигина 5G стандарти сигналини тарқатган.
MobileUK’нинг маълум қилишича, ижтимоий тармоқларда телекоммуникацион тармоқларнинг COVID-19’га таъсири ҳақидаги ёлғон маълумотлар тарқалган. «5G ҳақида тарқалаётган назариялар ҳеч қандай илмий асосга эга эмас ва ишончли илмий назарияга асосланмаган», — дейилади ассоциация хабарида.
Шунингдек, ташкилот томонидан билдирилишича, алоқа минораларининг зарарланиши коронавирусни тўхтатмайди, бироқ ёрдам сўраб тезкорлик билан мурожаат қилмоқчи бўлган кишилар саломатлиги учун қўшимча хавфларни юзага келтириши мумкин.
Изоҳ (0)