Япония коронавирус сабабли юзага келган инқироз шароитида аҳолини қўллаб-қувватлаш дастурини ишга туширди ва фуқароларга пул тарқатишни бошлади. Бу ҳақда мамлакатнинг маъмурий ишлар ва коммуникациялар вазири Санаэ Такаитига таяниб, «ТАСС» хабар берди.
Маълум қилинишича, 100 минг иена (тахминан, 930 доллар) миқдоридаги нафақа мамлакатнинг ҳар бир фуқаросига тўланади. Тўловлар мамлакатнинг 1388 та муниципиалитетида бошланган ва бу муниципиалитетлар умумий сонининг 79,7 фоизини ташкил қилади.
Маблағлар 2020 йилда тасдиқланган 25,6 триллион иена (237 миллиард доллар) миқдоридаги қўшимча бюджетдан олинган. Мазкур бюджет апрель ойининг охирида коронавирус шароитида иқтисодиётни қўллаб-қувватлаш учун тасдиқланган.
Японияда мазкур тўловларни олувчилар қаторида мамлакат қамоқхоналарида сақланаётган фуқаролар ҳам бўлади. Нафақаларни ҳатто ўлим жазосига ҳукм қилинганлар ҳам олиши мумкин.
Эслатиб ўтамиз, Япония ҳукумати фуқароларига коронавирус сабаб пул тарқатишга апрель ойида қарор қилганди. Бундан ташқари, Япония коронавирус оқибатларига қарши курашиш учун яна 929 миллиард доллар ажратишни режалаштирмоқда.
Изоҳ (0)