Putin koronavirus pandemiyasi tufayli G‘alaba paradi o‘tkazilishini keyinga qoldirdi

Koronavirus pandemiyasi tufayli Putin g‘alabaning 75 yilligini nishonlash bilan bog‘liq barcha tadbirlarni bekor qildi. Bu haqda Rossiya prezidenti Xavfsizlik kengashi bilan yig‘ilishda ma’lum qilgan.

“Hozir oldimizda qiyin tanlov turibdi. 9-may sanasi ham, har bir kishining hayoti ham biz uchun qadrlidir”, — degan Putin.

“9-may paradiga tayyorlanish hozirdan boshlanishi kerak. Biroq epidemiya bilan bog‘liq xavf-xatarlar hali juda yuqori va bu menga parad va boshqa ommaviy tadbirlarga tayyorgarlik ko‘rishni boshlash huquqini bermaydi”, — deb ta’kidlagan u.

Prezidentning so‘zlariga ko‘ra, barcha tantanali tadbirlar, jumladan, G‘alaba paradi va O‘lmas polk yurishi keyinchalik 2020-yilda o‘tkaziladi. O‘tkazish kechiktirilgani bilan G‘alaba kunini 9-mayda nishonlash davom etadi va bu sana o‘zgartirilmaydi.

Ma’lumot uchun, bu yilgi harbiy paradda Shavkat Mirziyoyev ham ishtirok etishi kutilayotgandi.

Eslatib o‘tamiz, Rossiyada so‘nggi bir sutkada koronavirusga chalinish bo‘yicha 3388 ta yangi holat qayd etildi. Kasallanganlarning umumiy soni 24 490 kishiga yetdi, 232 nafar bemor vafot etdi, 2304 kishi tuzaldi. Koronavirus mamlakatning 84 ta hududida aniqlangan. Koronavirus qayd etilmagan yagona hudud Oltoy Respublikasi bo‘lib qolmoqda.