Ижтимоий тармоқларда Сардоба сув омбори тўғонининг ёрилиши оқибатида юзага келган сув тошқини вақтида уй ичида қолиб кетган аёлнинг қутқарилиши тасвирланган видео пайдо бўлди.

Фото: «Давергеодезкадастр» қўмитаси ахборот хизмати

Видеодан кўриш мумкинки, икки нафар Миллий гвардия ҳарбий хизматчиси сув тошқини вақтида панароқ жойга яширинишга муваффақ бўлган аёлнинг эҳтиёткорлик билан ташқарига чиқишига кўмаклашган. Воқеа фалокатнинг эртаси куни, яъни 2 май куни содир бўлгани айтилмоқда.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори дамбасининг 6-пикет деворида сув чиқиши юзага келганди. Оқибатда Сардоба тумани Қўрғонтепа аҳоли яшаш пунктига сув кирган.

Фавқулодда вазият туфайли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган, ҳодиса оқибатида камида 56 киши турли даражада тан жароҳати олган, тошқин зонасида қолиб кетган юзлаб одамлар қутқарилган, шунингдек, 4 нафар фуқаронинг табиий офат оқибатида ҳалок бўлгани, 1 нафари бедарак йўқолгани аниқланди.

Фалокатда салкам 6 мингта турар жойга зарар етган. Тўғоннинг ёрилиши юзасидан жиноят иши қўзғатилган.