Sardobadagi falokatda salkam 6 ming turar joyga zarar yetdi

“Davyergeodezkadastr” qo‘mitasi tomonidan Sardoba suv omborida ro‘y bergan toshqindan zarar ko‘rgan hududlardagi turar va noturar ko‘chmas mulk obyektlari o‘rganib chiqildi. Bu haqda “Daryo”ga qo‘mita axborot xizmati ma’lum qildi.

Ma’lum qilinishicha, 10-may holatiga ko‘ra, 10 ta mahalla fuqarolar yig‘inining 20 ta aholi yashash punktida jami 5 969 ta turar va 277 ta noturar joy obyektlari talafot ko‘rgani aniqlangan. Mazkur turar joylarning 4 587 tasi yakka tartibdagi uy joy, 1 337 tasi ko‘p qavatli xonadon va 45 tasi qurilishi tugallanmagan uy-joylardir.

Hozirgacha 3 599 ta turar va noturar joylarning kadastr hujjatlari va kadastr pasportlaridan dublikatlari ko‘chmas mulk egalari va foydalanuvchilarga taqdim etish uchun tayyorlangan.

“Shuningdek, ‘Davyergeodezkadastr’ qo‘mitasi tomonidan suv toshqinidan aziyat chekkan aholi uylarining kadastr hujjatlari bepul tayyorlab berilishi ko‘zda tutilgan”, — deyiladi xabarda.