«Тошқин такрорланишидан қўрқяпман, бу ердан кўчиб кетаман». Сардоба фалокатида жабрланган чўпон ҳасрати

Сардоба фалокати оқибатида минглаб фуқаролар сингари жабр кўрган чўпон Зафар Қурбонов «Севимли» телеканалининг «Замон» информацион дастури мухбирига бошдан кечирган қийинчиликлар ҳақида сўзлаб берди.

«Мен халқнинг молини боқаман, подачиман. Поданинг орқасидан йиғиниб шу ишни қилган эдим. Бошқа жойдан даромадим йўқ эди. Шу халқнинг молини боқиб, шу уйни солган эдим, ҳаммаси бир тийин бўлди. 15 йил бировнинг уйида ижарада яшаб, олти йил мол боқиб юриб, олти йил деганда, зўрға пул йиғиб, шу уйни солган эдим.

Ҳозир ўзим аввал молларимни бойлаб, боқадиган жойда яшаяпман. Молларимни жўнатиб юбордим. Шунча нарсани ташлаб кетиб бўлмаяпти. Эрталаб туриб, одамларга қўшилиб чойни ичиб келиб, яна шу ерда қўлимдан келганича иш қиляпман, уйни бузяпман.

Бир кунда сув келиб, босиб, ҳаммаёқ тугади. Бу ерда яшашга қўрқиб қолдим. Худога шукр, бизни тонгда сув урди. Агар сув кечаси босганида, анча-мунча одам омон қолмасди.

Янги уйда бир ярим, икки йил яшадим. Лекин ҳали мазза қилганим йўқ. Етти йилда қурилган сув омбори етти йил туриб бермади. Энди мени бу ерга умуман қизиқишим қолмади. Худо хоҳласа бу ерда яшамайман, бошқа ерга кетаман.

Гапнинг очиғи, яна шу ҳолат такрорланишидан қўрқяпман, йўқотишдан қўрқяпман. Шунча сарф-харажат бир пул бўлди. Кеча аёлим келди, «Қандай қилиб бўлса ҳам бошқа ердан жой топ», деди. Жоним омон бўлса, бошқа ерга жой қилиб кетаман.

Ҳозир халқнинг молини боқишга имконият ҳам йўқ. Ватан қилиш керак. Насиб қилса, бошқа ерга уй-жой қилиб кетаман. Худо хоҳласа, ҳаётимни нолдан бошлайман. Қанча пул йиғиб, шу ҳолатга келтиргандим. Ҳали ҳам Тожмаҳал эмас бу, кичкинагина уй. Тожмаҳал бўлганида, билмадим энди...», — дейди Зафар Қурбонов ўз интервьюсида.

Сардоба туманидаги «Қўрғонтепа» маҳалласида яшовчи фуқаронинг айтишича, у ўз томорқасига иссиқхона қуриш учун тижорат банкларидан кредит олишга ҳаракат қилган. Аммо бирор натижа бўлмагач, ўзи маблағ йиғиб, яхши ниятлар билан иссиқхона қурган. Бироқ фалокат оқибатида барча помидор кўчатлар «ўлган».

«Иссиқхона қуриш учун кредит ололмадим, отангга бор, энангга бор, дейишди. Лекин телевизорда юртбошимиз ҳаракат қилганга бер, деяпти. Аммо бу ерда фақат бой бойга, сув сойга оқяпти. Бўлди бошқа гап йўқ.

Шу бир ярим сотих ердаги помидорни экишга 7,5 миллион сўм пул кетди. Болаларимга едирмай, тўхтаб тур, шуни қилайлик, Худо хоҳласа иш бўлади, пул бўлади бизга, деб иссиқхона қилгандим. Лекин мана барчаси зах чақиб, тагидан ҳаво кирмай ‘ўлди’ », — дейди сардобалик чўпон.

Эслатиб ўтамиз, 1 май куни тонгда Сардоба сув омбори 6-пикети тўғонининг ўпирилиши оқибатида йирик сув тошқини юз берди. Ҳодиса оқибатида 100 мингга яқин одам хавфсиз ҳудудларга эвакуация қилинди, 10 та маҳалла фуқаролар йиғинининг 20 та аҳоли яшаш пунктида жами 5 969 та турар ва 277 та нотурар жой объектлари талафот кўрди. Тошқин оқибатида етган зарар суммаси, тахминий бўлса-да, ҳозирча эълон қилингани йўқ.

Тошқиндан жабр кўрган аҳолига ёрдам кўрсатишда ўзбекистонликлар мисли кўрилмаган фаоллик кўрсатди. Шунингдек, россиялик миллиардер Алишер Усмонов Сардоба фалокатининг Ўзбекистондаги жабрланувчиларига 10 миллион доллар хайрия пули ажратди. Президент Шавкат Мирзиёев эса тошқиндан жабр кўрганлар «икки ой ичида ҳовлисига райҳон экилган янги уйларга кўчиб ўтиши керак»лигини таъкидлади.

Фалокат юз бериши юзасидан дастлабки расмий тахминлар эълон қилинмаган, фақат Ўзбекистон давлат телевидениеси орқали тўғон ўпирилишига 1 майга ўтар кечаси кузатилган кучли ёмғир ва шамол сабаб бўлган бўлиши мумкинлиги айтилди. Ҳодиса юзасидан жиноят иши қўзғатилган, тергов Давлат хавфсизлик хизмати томонидан олиб борилмоқда. Президент Шавкат Мирзиёев ҳодиса айбдорлари қонун олдида жавоб беришини маълум қилган.