Тошкентдаги «Абу Сахий» бозори очилгани, фаолиятига рухсат берилгани ҳақида хабарлар тарқалди. Санитария-эпидемиологик осойишталик агентлиги директорининг биринчи ўринбосари Ботиржон Қурбонов бу хабарлар қанчалик ҳақиқатлигига аниқлик киритди.
«Айни вақтда Республика махсус комиссиясининг қарори билан озиқ-овқат фаолияти билан боғлиқ бўлган хизмат турлари ҳудуднинг тоифаланишидан қатъи назар фаолият кўрсатиб келмоқда. ‘Абу Сахий’ буюм бозори фаолиятига рухсат берилмаган ва бу каби хабарлар ҳақиқатга тўғри келмайди», — дея жавоб берган у АОКА ҳузуридаги штабда ўтказилган брифингда.
Эслатиб ўтамиз, Ўзбекистонда 24 мартдан бошлаб Тошкент шаҳри, Қорақалпоғистон Республикаси ва вилоятларда жойлашган деҳқон бозорларидан ташқари барча бозорларнинг фаолияти тўхтатилган. Карантин даврида аҳолига қулайлик яратиш мақсадида вилоятнинг барча шаҳар, туманларида кўчма бозорлар ташкил этилган. Тошкентда уйлар яқинида кийим-кечак ва хўжалик моллари сайёр бозорини ташкил этишга рухсат берилган.
Республика махсус комиссиясининг 14 майдаги қарори билан Ўзбекистонда амалдаги карантин талаблари 1 июнга қадар узайтирилган. Ўзбекистон коронавирус тарқалишидан келиб чиқиб ҳудудлар «қизил», «сариқ» ва «яхшил» тоифаларга ажратилган эди. Барча тоифадаги ҳудудлар учун буюм бозорлари фаолиятини йўлга қўймаслик талаби сақланиб қолган.
Изоҳ (0)