Халқаро валюта жамғармаси 375 миллион доллар миқдорида кредит ажратишда Ўзбекистонга қўшимча шарт қўймайди. Бу ҳақда молия вазири ўринбосари Одилбек Исоқов маълум қилди, деб ёзмоқда «Gazeta.uz».

Фото: «Дарё»

Халқаро валюта жамғармаси

Халқаро валюта жамғармасининг Ўзбекистонга кредит ажратишга розилик бергани ҳақида 23 апрель куни бош вазир ўринбосари — иқтисодий ривожланиш ва камбағалликни қисқартириш вазири Жамшид Қўчқоров маълум қилган эди.

«Одатда Халқаро валюта жамғармаси ҳукуматларга кредит ажратмайди, бироқ ҳозирги вазиятдан келиб чиқиб улар Ўзбекистонга 375 миллион доллар беришга рози бўлди», — дейди Жамшид Қўчқоров.

Молия вазири ўринбосари Одилбек Исоқовнинг таъкидлашича, кредит ажратишда ХВЖ Ўзбекистондан унинг кўмагида амалга оширилаётган ислоҳотларни давом эттиришни сўрайди.

«ХВЖ 375 миллион доллар миқдорида қарз таклиф қилди, бу Ўзбекистон томонидан жамғармага тўланадиган аъзолик бадалининг ярми. Биз ҳозир бу таклифни кўриб чиқяпмиз. Бу сиз ўйлаётган шартлар эмас. Агар бошқа давлатларда аввал бўлган инқирозларга қарайдиган бўлсак, Туркия ХВЖнинг баъзи талабларини бажариш шарти билан кредит олган, Аргентина, Венгрия, Латвия ва бошқалар ҳам. Турли мамлакатлар инқирозлар вақтида ХВЖга мурожаат қилган ва бир неча миллиардлик кредитлар олган. Бироқ ўшанда кўплаб ислоҳотлар бўйича ХВЖ билан келишиш керак бўлган. У кредитларнинг режалаштирилаётган 375 миллион долларлик кредитдан фарқи шундаки, бу пуллар коронавирус сабабли давлат бюджетини қўллаб-қувватлашга ажратилади», — дея маълум қилган вазир ўринбосари.

Молия вазири ўринбосарининг таъкидлашича, ХВЖ қўшимча шартлар қўймайди. Жамғарма Ўзбекистондан бошланган ислоҳотларни давом эттиришни сўрайди.

Жаҳон банки

Молия вазири ўринбосарининг сўзларига кўра, яқин вақт ичида Жаҳон банкининг 200 миллион долларлик кредити кутилмоқда. Таклиф Жаҳон банки директорлари томонидан апрель ойи охирида маъқулланганидан кейин маблағлар май ойидан келиб тушишни бошлайди.

Осиё тараққиёт банки ва Франция тараққиёт агентлиги

Одилбек Исоқовнинг сўзларига кўра, Осиё тараққиёт банки ва Франция тараққиёт агентлиги энергетика соҳасидаги ислоҳотларга кредит ажратади.

JICA

Япония халқаро ҳамкорлик агентлиги қишлоқ хўжалиги ва мева-сабзавотчиликни ривожлантиришга кредитлар ажратди. Бу маблағлар иссиқхоналар қурилишига, пахта ва буғдой етиштириш ўрнига қўшимча қийматга эга мева-сабзавот етиштириш учун йўналтирилади.

Аввалроқ Молия вазирлиги Ўзбекистон ҳукумати томонидан 2019 йилда жалб қилинган қарз миқдорини маълум қилган эди. Ўзбекистон Президентининг 22 апрелда имзолаган қарорига кўра, пандемия оқибатларини камайтириш учун 2020 йилда 3,1 миллиард доллар жалб қилиш режалаштирилмоқда.