Далалардаги феромон тутқичлар орқали зараркунандаларни олдиндан билиб, уларга қарши курашиш мумкин. Бу ҳақда 24 апрель куни АОКАда ўтказилган брифингда Вазирлар Маҳкамаси ҳузуридаги Ўсимликлар карантини давлат инспекцияси вакили Дурдона Очилова маълум қилди.
Инспекция ахборот хизмати раҳбарининг маълум қилишича, Ўзбекистонда мева-сабзавот ва текстиль маҳсулотлар экспорти билан шуғулланувчи кўплаб корхоналар фаолияти ҳам коронавирус пандемияси туфайли бутунлай ёки қисман масофадан ишлаш тизимига ўтган. Шу боис инспекциясининг ҳам барча шартномалари тўлиқ онлайн офферта тизимида юритилмоқда.
Очилова брифинг давомида уч йил аввал 10 гектар майдонда боғ ташкил этган боғбоннинг «Зaрaркунандалар ҳосилни нобуд қилишини олдиндан аниқлаш имкони мавжудми?» деган саволига шундай жавоб берди:
«Республиканинг Фарғона, Андижон ва Наманган вилоятларидаги ўнга яқин туманда БМТнинг Ўзбекистондаги ривожлантириш дастури доирасида сигналлар ёрдамида ҳашаротларнинг ҳаракатланиши орқали уларнинг популяциясини аниқлаш хусусиятига эга жами 9 та замонавий метеостанциялар ташкил қилинди. Тошкент ва Сурхондарё вилоятларида ҳам шундай метеостанциялар ишга туширилиши режалаштирилган.
Баҳорги мавсум дала назорати учун муҳим давр бўлгани боис инспекциянинг туман агроном-инспекторлари томонидан ҳар бир гектар учун далада феромон тутқичлар қўйилмоқда. Бундай усул зараркунандаларнинг далада мавжуд эканлигини, қачон ва қанча миқдорда кимёвий қарши курашиш ишлари амалга оширилиши лозимлигини кўрсатади. Ҳозирда мамлакат бўйича 11 мингдан ортиқ феромон тутқичлар экспорт маҳсулотлари етиштириладиган далаларга тарқатилган бўлиб, умумий 30 мингта қўйилиши кўзда тутилган», — деди Дурдона Очилова.
Изоҳ (0)