Карантин туфайли ижара хонадони бўшаб қолган уй эгалари кўчмас мулк ижара шартномасини вақтинча бекор қилинганлиги ҳақидаги келишувни ҳисобга қўйиш учун сўровномани тўлдириши лозим. Бу ҳақда 24 апрель куни АОКАда ўтказилган брифингда Давлат солиқ қўмитаси вакили Музаффар Юсуф Назаров маълумот берди.
Қўмита вакилининг таъкидлашича, кўчмас мулк ижара шартномаси муддатидан олдин бекор бўлганда, кўчмас мулк ижара шартномасини вақтинча бекор қилинганлиги ҳақида келишув ихтиёрий шаклда тузилади.
«Ижарага берувчи кўчмас мулк ижара шартномасини вақтинча бекор қилинганлиги ҳақидаги келишувни давлат солиқ хизмати органларида ҳисобга қўйиш учун, ўзининг шахсий кабинети ёки Давлат солиқ қўмитасининг «my.soliq.uz» солиқ хизматлари порталидаги «Ижара шартномаларини ҳисобга қўйиш» интерактив давлат хизмати орқали белгиланган шаклдаги сўровномани тўлдириб, электрон тарзда юборади», — деди Музаффар Юсуф Назаров.
«Сўровномага кўчмас мулк ижара шартномасини вақтинча бекор қилинганлиги ҳақидаги келишув нусхаси бириктирилади, шунингдек, келишув икки томонлама тасдиқланган бўлиши керак, чунки ўртада низо келиб чиқиши мумкин ва бундай ҳолатларда суд тартибида ҳал қилинади», — дея қўшимча қилди бошқарма бошлиғи ўринбосари.
Изоҳ (0)