Карантин даврида мингдан ортиқ оилага озиқ-овқат тарқатган андижонлик тадбиркор яна 300 та оилани қарамоғига олди. Бу ҳақда «Дарё»га вилоят ҳокимлиги ахборот хизмати маълум қилмоқда.
Таъкидланишича, президент Шавкат Мирзиёев ташаббуси билан фаолиятини бошлаган «Саховат ва кўмак» умумхалқ ҳаракати андижонлик 100 дан ортиқ ёш тадбиркор томонидан қўллаб-қувватланган. Улар уч ой мобайнида 500 тагача оилани ўз қарамоғига олишни мақсад қилган.
Вилоят ҳокимлиги котибият мудири Элёр Ҳолмирзаевнинг қўшимча қилишича, Президент томонидан 20 апрель куни ўтказилган йиғилишда илгари сурилган «Саховат ва кўмак» умумхалқ ҳаракатини биринчи бўлиб ёш тадбиркор Абдуллоҳ Мадаминов бошлаб берган.
Карантин даврида мингдан ортиқ оилага кўмак берган тадбиркор яна 300 та оилани қарамоғига олган. 23 апрель куни унинг дастлабки ҳомийлиги асосидаги хайриялари эҳтиёжманд ва ижтимоий ҳимояга муҳтож оилаларга тарқатилган.
«Барчамиз учун муқаддас бўлган Рамазон ойи ҳам кириб келди. Бу ойда эҳтиёжманд ва муҳтож оилаларга ёрдам кўрсатиш ҳам қарз, ҳам фарздир. Шунинг учун нафақат тадбиркор сифатида балки, инсонийлик жиҳатдан ҳам қўни-қўшниларимиз ва яқинларимизга яхшилик қилишни мақсад қилиб қўйгандим. Юртбошимиз ташаббуси эса бу ишларимни янада олдинга силжишига туртки бўлди. Бундай синовли кунларда барча қатори ўз ҳиссамни қўшаётганимдан хурсандман,» – дейди Абдулло Мадаминов.
Яна бир тадбиркор — Азизбек Омонов эса ўзи сайланган округ ҳудудидаги 70 га яқин оилани қўллаб-қувватлаш истагини билдирган. «Жажжи юлдузлар» нодавлат мактабгача таълим ташкилоти раҳбари Миржаҳон Ҳакимов эса 100 та хонадонга ижтимоий ёрдам кўрсатишни мақсад қилган.
Эслатиб ўтамиз, Президент Шавкат Мирзиёев 20 апрель куни бўлиб ўтган йиғилишда, жумладан, шундай деганди: «Имкониятидан келиб чиқиб, қайсидир тадбиркор бир ойда мисол учун 10 та, бошқа бири эса 20 та оилага кўмаклашиши, энг муҳими муҳтож оилалар аъзоларини ишга жалб қилиши мумкин. Давлат томонидан бундай тадбиркорларга солиқ, лизинг, кредит тўловлари, зарур ресурслар билан таъминлаш бўйича турли имтиёз ва преференсиялар берилади. Яъни бу аҳолига давлат томонидан тадбиркорлик субъектлари орқали кўрсатиладиган саховат ва кўмак бўлади».
Изоҳ (0)