Ўзбекистон Инновацион соғлиқни сақлаш миллий палатаси 23 апрель куни Тошкент халқаро аэропортида ўпка касалликларини даволаш учун мўлжалланган КТЭА электрон аппаратлардан иборат 4 та жамланмани қабул қилиб олди. Бу ҳақда миллий палата ахборот хизмати хабар берди.
Маълум қилинишича, келтирилган аппаратлар Хитойда коронавирус ўчоғига айланган Ухань шаҳрида COVID-19’нинг оғир кўринишларини даволашда юқори самара берган.
Инновацион қурилма Ўзбекистонга миллий палата ва Пекиннинг Beijing Hong Tian Li Fhamaceutical Co.Ltd компанияси ўртасидаги ҳамкорлик доирасида етказиб берилган. Қурилма шифохоналарга коронавирус инфекцияси билан касалланган беморларни даволаш учун беғараз топширилади.
Ўпка касалликларини даволаш учун электр мосламаси КТЭА-TTS Treatment Device Хитойнинг Beijing Shenzhou Hanfang Medical Technology Co. Ltd компанияси томонидан ишлаб чиқарилган.
Маълум қилинишича, миллий палата раиси Равшан Изамов Хитой Ҳаёт ва соғлиқни сақлаш ассоциацияси билан ҳамкорлик тўғрисида келишувга эришган. Ушбу уюшма директорининг ўринбосари Чэнь Синьпиннинг сўзларига кўра, Хубэй провинциясининг Ухань шаҳрида КТЭА электр қурилмалари COVID-19 ташхиси қўйилган беморларни даволашда юқори самарадорликни намойиш этган. Натижада Хитой пойтахти Пекин шаҳридаги аксарият касалхоналар ҳозирда КТЭА қурилмалари билан жиҳозланган.
Таъкидланишича, Хитой томони КТЭА аппаратидан фойдаланиш ва даволаш усуллари тўғрисида мавжуд барча маълумотларни тақдим этган.
Миллий палата раисининг сўзларига кўра, Чэнь Синьпин билан Wе Chat ижтимоий тармоғида махсус гуруҳлар ташкил этиш орқали онлайн консултацияларни ташкил этиш имконияти тўғрисида келишувга эришилган. Бу хитойлик шифокорларга бугунги кунда COVID-19 билан оғриган беморларни даволашда устувор бўлган КТЭА ускунасидан самарали фойдаланишда амалий ёрдам кўрсатишга имкон бериши айтилган.
Эслатиб ўтамиз, Ўзбекистонда коронавирусга қарши курашда 15 нафар хитойлик шифокор ва 1 нафар кореялик мутахассис ҳам иштирок этмоқда. Бундан ташқари, Ўзбекистон Хитойдан уч марта гуманитар ёрдам юкларини қабул қилди ҳамда мазкур мамлакатдан 200 мингта тест тизимини сотиб олди.
Изоҳ (0)