Жаҳон соғлиқни сақлаш ташкилоти вакили Мелита Вуйновичнинг маълум қилишича, Россияда коронавирус тарқалишига қарши жорий қилинган чекловлар иш бермоқда, мамлакат эпидемияга қарши курашишни эплаяпти. Бироқ касалланишнинг энг юқори чўққиси ўтганлиги ҳақида узоқ вақт давомида ижобий ўзгаришлар кузатилгандагина гапириш мумкин. Бу ҳақда «РИА Новости» хабар берди.
«Ижобий ўзгаришлар мамлакатнинг барча жойида етарлича узоқ вақт давом этаётганига ишонч ҳосил қилиш керак. Шундан кейингина касаллик тарқалишининг энг юқори чўққиси ўтгани ҳақида гапириш мумкин. Ҳозирча айтиш мумкинки, қўлланилаётган чеклов чоралари иш бермоқда ва тизим мамлакатда эпидемияга қарши курашни эплай оляпти», — дея таъкидлаган ташкилот вакили.
Унинг сўзларига кўра, Россияда ҳам, Москвада ҳам 20 апрелдан бошлаб касалланиш билан боғлиқ янги ҳолатларнинг камайиши кузатилмоқда.
Россия президенти Владимир Путин 20 апрель куни берган баёнотида мамлакатда касалликнинг энг юқори чўққиси ҳали олдинда эканлигини айтган. У мамлакатда коронавирус тарқалиши билан боғлиқ вазиятни мураккаб деб атаган.
Путиннинг матбуот котиби Дмитрий Песковнинг сўзларига кўра, Россияда касалликнинг энг юқори чўққиси май ойида кузатилади. Москва мэри ўринбосари Анастасия Ракова шаҳарда касалликнинг энг юқори чўққиси май ойининг бошида кутилаётганини айтган эди.
Маълумот учун. 22 апрель ҳолатига кўра, Россияда COVID-19 қурбонлари сони 513 кишига етди, касалланганлар сони 58 минг кишига яқинлашди, 4420 киши даволанишга муваффақ бўлди.
Изоҳ (0)