Вьетнамда ҳафта давомида коронавирусга чалиниш бўйича бирорта ҳолат қайд этилмагани учун мамлакатда жорий этилган чеклов чораларини бекор қилиш бошланди. Бу ҳақда 23 апрель, пайшанба куни, Вьетнам ОАВларида хабар берилган.
Мамлакат бош вазири Нгуен Суан Фукан 22 апрель куни COVID-19 тарқалишининг олдини олиш бўйича миллий қўмита йиғилишида билдиришича, айрим чекловларнинг олиб ташланиши ҳотиржам тортишга асос бўлолмайди.
Унинг айтишича, Вьетнамнинг аксарият шаҳарларида тадбиркорлик ва бошқа фаолият турлари, шунингдек, хизмат кўрсатишга жорий этилган чекловлар олиб ташланади, дўконлар, кафе ва ресторанлар очилади. Бироқ аҳоли инфекция тарқалишининг олдини олиш чораларига риоя қилиши шарт.
Вазирнинг сўзларига кўра, аҳоли «янгича ҳаёт тарзи»ни қабул қилиб, одамларни жамоат жойларида ниқоб тақишга, оқилона масофани сақлашга ва кўп одамлар тўпланувчи йиғилишларнинг олдини олишга чақириши лозим.
Шунингдек, Вьетнам пойтахти Ханойда, Бакнин ва Хазянг провинциялари ва Хошимин шаҳрида айрим чекловлар сақланиб қолади. Мамлакатда касалланиш хавфи юқори деб топилган Ханойнинг айрим ҳудудларида эса карантин чоралари 30 апрелгача давом этади. Чоршанба кунидан бошлаб Вьетнамнинг ички авиақатновлари ҳам ишга тушишни бошлайди.
Маълумот учун, Вьетнамда карантин режими 1 апрелда жорий этилган. Мамлакатда умумий ҳисобда 268 киши коронавирусга чалингани тасдиқланган, уларнинг 216 нафари тузалган, ўлим ҳолатлари қайд этилмаган.
Ўзбекистонда эса коронавирусга чалинганлар сони 1735 нафарни ташкил этмоқда. Улардан 561 нафари тузалди, етти нафари вафот этди. Республика махсус комиссияси томонидан 20 апрелга қадар жорий этилган карантин ҳамда коронавирус инфекцияси тарқалишига қарши кучайтирилган тартиб 10 майга қадар узайтирилди.
Изоҳ (0)