Янги турдаги COVID-19 коронавирус пандемияси бошқа шу турдаги 23 та пандемия билан таққосланганда, энг хавфли йигирматаликка ҳам кирмаслиги маълум бўлди. Бу ҳақда Deutsche Bank тадқиқот ҳужжатларига таяниб, «РБК» хабар берди.
Тадқиқот муаллифлари тарихий маълумотларга таяниб, камида 100 минг кишининг умрига зомин бўлган пандемия ва эпидемияларни таҳлил қилиб кўрди. Улар 24 касалликдан иборат рўйхатни тузиб, жаҳон аҳолисининг қанча қисми вафот этганини ҳисоблаб чиқди. Deutsche Bank’нинг таъкидлашича, қурбонлар сони ҳар хил келтирилгани сабаб тадқиқотчилар турли хил манбалардан фойдаланган.
Сўнгги маълумотларга кўра, COVID-19 оқибатида Ер аҳолисининг 0,002 фоизи вафот этган (Жонс Ҳопкинс университети маълумотларига кўра, 182 мингдан ортиқ бемор вафот этди). Ушбу кўрсаткичга кўра, 2009—2010 йилларда тарқалган чўчқа гриппи ҳозирги пандемиядан ўтиб кетган: ўшанда аҳолининг 203 минги ёки 0,003 фоизи вафот этганди.
Бугунги кунда ўлим билан якунланаётган касалликлар орасида ОИТС пешқадамлик қилмоқда. 1981 йили ОИВ касаллиги аниқланганидан буён ҳозирга қадар аҳолининг 0,57 фоизи (30 миллион одам) унинг оқибатида вафот этган ва бу пандемия ҳали ҳам давом этмоқда. Сўнгги юз йилликнинг кенг кўламли пандемияларидан бири «испанка» («испан гриппи») бўлиб, Биринчи жаҳон урушидан кейин тарқалган. Ушбу касаллик оқибатида 50 миллион одам, ўша даврдаги аҳолининг 2,73 фоизи қирилиб кетган.
Инсоният тарихида сўнгги икки минг йил ичидаги энг хавфли касаллик — бу «қора ажал» бўлиб, 1347—1351 йилларда тарқалган. Мазкур ўлат оқибатида ўша даврдаги Ер аҳолисининг 42 фоизи — 200 миллион киши вафот этган. Византия императори Юстиниан I даврида (541—542 йиллар) тарқалган ўлат оқибатида эса 28,51 фоиз аҳоли — 60 миллион киши касаллик қурбонига айланган.
Аввалроқ америкалик олимлар коронавирусга чалинганлар сони расмий рақамлардан ўн баравар кўп бўлиши мумкинлигини маълум қилганди.
Изоҳ (0)