Коронавирус пандемияси ва карантин чоралари сабаб юзага келган иқтисодий инқироз оқибатида 2020 йилда бутун дунё бўйлаб пул ўтказмалари ҳажми 20 фоизгача кескин қисқариши мумкин. Бу ҳақда Жаҳон банкининг янги ҳисоботида сўз боради.
Экспертларнинг таъкидлашича, сўнгги вақтлардаги энг катта қисқариш бўлиши кутилаётган бу каби ҳолат меҳнат муҳожирлари иш ҳақининг камайиши ва уларнинг ишсиз қолиши, иқтисодий инқироз оқибатида уларни қабул қилувчи давлатлар қисқараётгани сабаб содир бўлмоқда.
Тахминларга кўра, кам ва ўртача даромадли давлатларга пул ўтказмалари 19,7 фоизга қисқаради (445 миллиард доллар), бунинг оқибатида эса кўплаб заиф уй хўжаликлари асосий молиявий манбасидан айрилади.
«Пул ўтказмалари ривожланаётган мамлакатлар учун муҳим даромад манбаси ҳисобланади. COVID-19 туфайли юзага келган ҳозирги рецессия пулни уйга юбориш имкониятига жуда салбий таъсир кўрсатади ва ривожланган мамлакатлар иқтисодиётини тиклаш учун зарур бўлган вақтни қисқартириш имкониятини янада оғирлаштиради», — дейди Жаҳон банки гуруҳи президенти Дэвид Малпасс.
Жаҳон банкининг ҳисоб-китобларига кўра, пул ўтказмалари, асосан, Европа ва Марказий Осиё мамлакатларига (27,5 фоизга) қисқаради. Уларнинг ортидан Африка жанубидаги давлатлар (23,1 фоиз), Жанубий Осиё (22,1 фоиз), Яқин Шарқ ва Шимолий Африка (19,6 фоиз), Лотин Америкаси ва Кариб ҳавзаси (19,3 фоиз) ҳамда Шарқий Осиё ва Тинч океани минтақалари (13 фоиз) ўрин олади.
Таъкидланишича, 2021 йилда кам ва ўртача даромадли давлатларга пул ўтказмалари билан боғлиқ вазият яхшиланади, уларнинг ҳажми 5,6 фоизга ўшиб, 470 миллиард долларга етади. Шу билан бирга, пул ўтказмалари прогнози борасида ҳам, COVID-19 тарқалишини чеклашга қаратилган чора-тадбирларнинг жаҳон иқтисодиётининг ўсиш истиқболларига таъсири каби бир хил ноаниқлик мавжуд.
Жаҳон банки маълумотларига кўра, 2019 йилда Европа ва Марказий Осиё давлатларига пул ўтказмалари қарийб 6 фоизга ўсган (65 миллиард долларга), бироқ кўрсаткичлар пандемия ва нефть нархининг арзонлашуви сабаб кескин қисқарган.
Ҳисоботда таъкидланишича, Россиядан пул ўтказмаларига бўлган юқори боғлиқлик даражаси Қирғизистон, Тожикистон ва Ўзбекистон иқтисодиётига ташқи салбий шоклар таъсирини кучайтириши мумкин.
Изоҳ (0)