Тожикистони президенти Эмомали Раҳмон мамлакатдаги фермер ва деҳқонлардан Рамазон ойи рўзасини кейинроқ тутиб беришни сўради. Бу ҳақда Тожикистон президентининг матбуот хизмати хабар берган.
Раҳмоннинг ўз мурожаатида коронавирус эпидемияси вақтида одамларнинг ўз соғлиғига зарар етказмаслиги кераклигини қайд этди.
«Кун давомида оч юриш инсон иммунитетини кучсизлантиради ва турли юқумли касалликлар юқтириб олиш эҳтимолини оширади», — деган Эмомали Раҳмон.
Тожикистон давлат раҳбари барчани экин майдонларида меҳнат қилишга ва рўза тутишни бошқа муддатга қолдириб, кейинчалик қазосини тутиб беришга чақирди.
Раҳмон Тожикистон халқига йўллаган мурожаатида пандемия туфайли ишни тўхтатмаслик лозимлиги, акс ҳолда, куз-қиш мавсумида ҳар бир оилада катта қийинчиликлар, бозорларда инқироз ва қимматчиликлар бўлишини таъкидлади.
Муқаддас Рамазон ойи 24 апрелдан бошланади ва 24 майга қадар давом этади.
Reuters агентлигининг ёзишича, Тожикистон Халқаро валюта жамғармасидан глобал рецессия сабаб иқтисодиётини тиклаш учун фавқулодда ёрдам сўраган. Тожикистон буғдойни импорт қилади ва мамлакатга асосий дон етказиб берувчи давлат Қозоғистон ҳисобланади. Қозоғистонда буғдой экспортининг лимитлари кескин қисқартирилган.
Аввал Тожикистонда пневмониядан вафот этган прокуратура ходими ёпиқ тобутда дафн этилгани, мамлакатдаги масжидлар яна ёпилиб, жума ва таровеҳ намозлари масжидларда ўқилмаслиги, Тожикистонда пневмониядан ўлган тўртинчи беморга қараган шифокорлар карантинга олингани, бироқ мамлакатда ҳали ҳам коронавирус расман қайд этилмагани ҳақида хабарлар берилган.
20 апрель куни Ўзбекистонда Рамазон ойи 24 апрелдан бошланиши маълум қилинган, ундан аввал Мусулмонлар идораси томонидан Рамазон ойини ўтказиш ҳақидаги баёнотда таровеҳ намозларини уйда ўқиш тавсия этилганди.
Изоҳ (0)