Ўзбекистонда коронавирусдан тузалган беморлар сони 503 нафарга етди. Сўнгги уч кун давомида мамлакат бўйича 242 киши касалликдан соғайиб, реабилитацияга кузатилди. Бу ҳақда Соғлиқни сақлаш вазирлиги хабар берди.
Тошкент шаҳридаги Вирусология илмий-текшириш институти клиникасида 2 нафар, Сурхондарё вилояти юқумли касалликлар шифохонасида 1 нафар, Бухоро вилоятида яна 6 нафар, жами 9 нафар бемор буткул соғайди ва 23 апрель куни реабилитацияга кузатилди.
Вирусология илмий-текшириш институти клиникасида соғайганларнинг 1 нафари (аёл) 54 ёшда бўлиб, Тошкент шаҳрида яшайди. Яна бир нафари (эркак) эса Тошкент вилоятидан, у 25 ёшда. Улар коронавирусга чалинганлар билан мулоқотда бўлиб, инфекция юқтириб олган.
Сурхондарёда тузалган бемор (эркак) эса 31 ёшда бўлиб, Сирдарё вилоятидан. У 2020 йил 27 март куни чартер рейс билан Россиядан Термиз шаҳрига келган ва карантинга олинган. Касаллик аниқлангач, эркак шифохонага ётқизилган.
Бухоро вилоятида соғайганларнинг 3 нафари Тошкент шаҳридан, 2 нафари Наманган вилоятидан бўлса, 1 нафари Бухоро вилоятидан. Уларнинг энг каттаси 62 ёшда, энг кичиги эса 21 ёшда. Самарали даволаш муолажаларидан кейинги текширувлар уларда инфекция йўқлигини кўрсатди.
Шунингдек, Тошкент шаҳридаги Эпидемиология, микробиология ва юқумли касалликлар илмий-текшириш институти клиникасида ҳам коронавирус инфекциясига чалинган навбатдаги 8 нафар бемор буткул соғайди. Улар ҳам 23 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Соғайганларнинг 5 нафари Тошкент шаҳридан, 2 нафари Тошкент вилоятидан ва 1 нафари Фарғона вилоятидан. Уларнинг 1 нафари БААнинг Дубай шаҳридан келган. Қолган 7 нафари коронавирус инфекциясига чалинган беморлар билан мулоқот орқали касалликни юқтириб олган. Беморлардан 2 нафари эркак, 6 нафари аёллардир. Улар орасида энг каттаси 66 ёшда бўлса, энг кичиги 13 ёшда.
Ушбу клиникада шу пайтга қадар коронавирусдан соғайганлар сони 58 нафарга етди.
Ўзбекистонда 23 апрель соат 19:00 ҳолатига кўра, коронавирус инфекциясини юқтириб олганлар сони 19 кишига ошиб, 1735 нафарни ташкил этмоқда. Мамлакатда 15 мартдан буён коронавирусга чалинган беморларнинг етти нафари вафот этди, Хорижда 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этган.
Изоҳ (0)