O‘zbekistonda koronavirus infeksiyasiga chalinib davolanayotgan o‘rta ahvoldagi har bir bemor uchun 32 million so‘mdan mablag‘ sarf qilinmoqda. Jonlantirish bo‘limida yotgan og‘ir ahvoldagi har bir bemorga o‘rtacha 64 million so‘mdan mablag‘ sarflanmoqda. Bu haqda sog‘liqni saqlash vaziri Alisher Shodmonov 23-aprel kuni bo‘lib o‘tgan brifingda ma’lum qildi.

Karantinda bo‘lib turgan fuqarolarning har biriga 14 kunlik karantin davri uchun 2,4 million so‘mdan, koronavirusdan tuzalib, reabilitatsiyaga olingan har bir bemor tiklanishi uchun 2,8 million so‘mdan sarflanmoqda.

“Qayd etib o‘tish kerakki, koronavirusga chalingan yoki kasallik gumon qilingan bemorlarni davolash, shuningdek, karantinga joylashtirilganlarga qarash davlat mablag‘lari hisobidan bepul amalga oshirilmoqda”, — deb ta’kidladi Alisher Shodmonov.

Uning so‘zlariga ko‘ra, Sog‘liqni saqlash vazirligi moliyalashtirish nuqtayi nazaridan hech qachon bunday erkin ishlamagan.

Vazirning so‘zlariga tayanib, “Gazeta.uz”ning yozishicha, vazirlikga 5,4 trillion so‘m, shu jumladan 3,9 trillion so‘m davlat budjetidan va 1,2 trillion so‘m Inqirozga qarshi kurash jamg‘armasidan ajratilgan. Shuningdek, xalqaro moliya tashkilotlarining 32 million dollar mablag‘i ham o‘zlashtirilgan. Bundan tashqari, jihozlar va qurilmalar sotib olish uchun 150 million dollarga shartnomalar imzolangan.

Alisher Shodmonovning aytishicha, koronavirusni aniqlash bo‘yicha shu paytgacha 210 mingtadan ortiq test o‘tkazilgan. Mamlakatda ayni paytda koronavirusga chalinganlar soni 1716 kishini tashkil etmoqda. Bemorlarning 18 nafari og‘ir ahvolda, 6 nafari o‘ta og‘ir ahvolda, 12 kishi nisbatan og‘ir ahvolda. Shu paytga qadar 455 nafar bemor tuzalgan. 7 kishi kasallik qurboniga aylangan.