Ўзбекистонда фуқаролар коронавирусга антитаначага эга эканликларини билиш учун таҳлил топширишлари мумкин. «Дарё» мухбирининг хабар беришича, бу ҳақда Санитария-эпидемиология назорати давлат инспекцияси бошлиғи Нурмат Отабеков 23 апрель, пайшанба куни, АОКА қошида ташкил этилган брифингда маълум қилди.
«Бугунги кунда коронавирусга чалинмадимми, деган савол кўпчиликни қизиқтиради. Антитаначаларга таҳлил орқали ким коронавирус билан аломатларсиз касалланганини, уларнинг сонини аниқлаш мумкин. Бу эса қўзғатувчи вируснинг қандай ҳаракатланишини тушунишга ёрдам беради.
Бироқ ташхиснинг олтин стандарти полимераз занжирли реакция усулидир. Тест аниқлигининг ўзига хослиги қарийб 100 фоиз, у ҳатто инкубация даврида ҳам энг яхши ташхис воситаси ҳисобланади», — дейди Отабеков.
Унинг айтишича, бугунги кунда мамлакатда лаборатория ташхиси асосан полимераз занжир реакцияси (ПЗР) усулида амалга оширилмоқда.
Шунингдек, Нурмат Отабековнинг таъкидлашича, Ўзбекистонда бугунги кунгача 196 830 киши коронавирусни аниқлаш учун тест топширган. Кунига ўртача 10 300 та тест ўтказилмоқда.
Эслатиб ўтамиз, янги эълон қилинган карантин тартибига мувофиқ, нодавлат тиббиёт ташкилотларига барча талабларга риоя қилган ҳолда ҳудудий санитария-эпидемиологик осойишталик марказлари раҳбарлари томонидан имзоланадиган шартнома асосида 2020 йил 1 сентябрга қадар коронавирус инфекциясини лаборатор текшириш бўйича пуллик тиббий хизмат кўрсатишларига рухсат берилган эди.
Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов коронавирус бўйича тест ўтказиш яқин вақт ичида ярим миллионга етказилишини айтганди.
Изоҳ (0)