O‘zbekistonda koronavirusdan tuzalgan bemorlar soni 503 nafarga yetdi. So‘nggi uch kun davomida mamlakat bo‘yicha 242 kishi kasallikdan sog‘ayib, reabilitatsiyaga kuzatildi. Bu haqda Sog‘liqni saqlash vazirligi xabar berdi.
Toshkent shahridagi Virusologiya ilmiy-tekshirish instituti klinikasida 2 nafar, Surxondaryo viloyati yuqumli kasalliklar shifoxonasida 1 nafar, Buxoro viloyatida yana 6 nafar, jami 9 nafar bemor butkul sog‘aydi va 23-aprel kuni reabilitatsiyaga kuzatildi.
Virusologiya ilmiy-tekshirish instituti klinikasida sog‘ayganlarning 1 nafari (ayol) 54 yoshda bo‘lib, Toshkent shahrida yashaydi. Yana bir nafari (erkak) esa Toshkent viloyatidan, u 25 yoshda. Ular koronavirusga chalinganlar bilan muloqotda bo‘lib, infeksiya yuqtirib olgan.
Surxondaryoda tuzalgan bemor (erkak) esa 31 yoshda bo‘lib, Sirdaryo viloyatidan. U 2020-yil 27-mart kuni charter reys bilan Rossiyadan Termiz shahriga kelgan va karantinga olingan. Kasallik aniqlangach, erkak shifoxonaga yotqizilgan.
Buxoro viloyatida sog‘ayganlarning 3 nafari Toshkent shahridan, 2 nafari Namangan viloyatidan bo‘lsa, 1 nafari Buxoro viloyatidan. Ularning eng kattasi 62 yoshda, eng kichigi esa 21 yoshda. Samarali davolash muolajalaridan keyingi tekshiruvlar ularda infeksiya yo‘qligini ko‘rsatdi.
Shuningdek, Toshkent shahridagi Epidemiologiya, mikrobiologiya va yuqumli kasalliklar ilmiy-tekshirish instituti klinikasida ham koronavirus infeksiyasiga chalingan navbatdagi 8 nafar bemor butkul sog‘aydi. Ular ham 23-aprel kuni Respublika ixtisoslashtirilgan terapiya va tibbiy reabilitatsiya ilmiy-amaliy tibbiyot markaziga kuzatildi.
Sog‘ayganlarning 5 nafari Toshkent shahridan, 2 nafari Toshkent viloyatidan va 1 nafari Farg‘ona viloyatidan. Ularning 1 nafari BAAning Dubay shahridan kelgan. Qolgan 7 nafari koronavirus infeksiyasiga chalingan bemorlar bilan muloqot orqali kasallikni yuqtirib olgan. Bemorlardan 2 nafari erkak, 6 nafari ayollardir. Ular orasida eng kattasi 66 yoshda bo‘lsa, eng kichigi 13 yoshda.
Ushbu klinikada shu paytga qadar koronavirusdan sog‘ayganlar soni 58 nafarga yetdi.
O‘zbekistonda 23-aprel soat 19:00 holatiga ko‘ra, koronavirus infeksiyasini yuqtirib olganlar soni 19 kishiga oshib, 1735 nafarni tashkil etmoqda. Mamlakatda 15-martdan buyon koronavirusga chalingan bemorlarning yetti nafari vafot etdi, Xorijda 73 o‘zbekistonlikda koronavirus aniqlangan (eng ko‘pi — 42 nafari — Rossiyada), ularning to‘rt nafari vafot etgan.
Izoh (0)