Ўзбекистонда коронавирусдан тузалганлар сони 486 кишига етди. Жиззахда биринчи бемор соғайди

Андижон вилояти юқумли касалликлар шифохонасида коронавирус инфекциясидан буткул соғайган 4 нафар бемор 23 апрель куни реабилитацияга кузатилди. Бу ҳақда Соғлиқни сақлаш вазирлиги хабар берди.

Соғайганларнинг барчаси Андижон вилоятидан. Улардан 1 нафари эркак, 3 нафари аёл бўлиб, улар коронавирусга чалинганлар билан мулоқотда бўлиб, инфекция юқтириб олган. Улар орасида энг каттаси 57 ёшда бўлса, энг кичиги 2019 йил туғилган.

Андижон вилояти юқумли касалликлар шифохонасидан тўлиқ тузалиб чиққан беморлар сони 51 нафарга етди.

Жиззах вилояти юқумли касалликлар шифохонасида коронавирус инфекциясига чалинган 1 нафар бемор буткул соғайди. У 23 апрель куни вилоят соғлиқни сақлаш бошқармаси масъуллари иштирокида реабилитацияга кузатилди.

Тузалган эркак 35 ёшда бўлиб, Жиззах шаҳрида яшайди. У коронавирусга чалинганлар билан мулоқотда бўлиб, инфекция юқтириб олган. Сўнгги текширувлар унда инфекция йўқлигини кўрсатди.

Шунингдек, 23 апрель куни Бухоро вилоятида бир йўла 31 нафар бемор тўлиқ соғайиб, реабилитацияга кузатилди.

Шифо топганларнинг 26 нафари Россиядан, 4 нафари эса Туркиядан чартер рейслар орқали Бухорога олиб келинган ва карантинга олинган. Коронавирус инфекцияси тасдиқлангач, улар вилоят юқумли касалликлар шифохонасига жойлаштирилган. 1 нафар бемор коронавирусга чалинганлар билан мулоқотда бўлиб, инфекция юқтириб олган.

Улардан 27 нафари эркак, 4 нафари аёл. Беморларнинг 6 нафари Тошкент шаҳридан, 5 нафари Самарқанд вилоятидан. Шунингдек, Андижон, Тошкент ва Бухоро вилоятларидан 4 нафардан, Сурхондарё ва Қашқадарё вилоятларидан 2 нафардан, Қорақалпоғистон Республикаси, Сирдарё, Жиззах, Фарғона вилоятларидан 1 нафардан бемор тузалганлар қаторига кирган. Улар орасида энг каттаси 69 ёшда бўлса, энг кичиги 16 ёшда.

Бухоро вилояти бўйича шу пайтга қадар коронавирусдан тузалган беморлар сони 114 нафарга етди. Ўзбекистонда коронавирус инфекциясидан соғайган беморлар сони эса 486 кишига етди.

Ўзбекистонда коронавирусга чалинган беморлар сони 23 апрель соат 10:00 ҳолатига кўра, 1716 нафарни ташкил этмоқда — касалланганлар сони 22 апрель соат 23:00 даги ҳолатдан бери ўзгаришсиз қолмоқда. Ўзбекистонда 15 мартдан буён етти нафар бемор инфекция асоратларидан вафот этди.