Американинг Миссури штати коронавирус сабаб Хитойни судга берди
Американинг Миссури штати бош прокурори Эрик Шмитт Хитой ҳукуматини коронавирус пандемиясида айблаб, уларга нисбатан даъво аризасини киритди. Бу ҳақда штат бош прокурори офиси хабар берди.
Даъвода жавобгар томон сифатида Хитой ҳукумати, мамлакат коммунистик партияси ва Хитойнинг бошқа мансабдор шахслар ҳамда давлат муассасалари кўрсатилган. Шмитт уларни пандемиянинг юзага келиши ва Миссурида жиддий иқтисодий оқибатларни келтириб чиқарган COVID-19 тарқалиши тўғрисидаги маълумотларни яширишда айбламоқда.
«Миссурида вируснинг таъсири жуда билинди: минглаб одамлар касалликка чалинган, кўпчилиги вафот этди, оилалар яқинларидан ажралган, кичик корхоналар ёпилди», — дейди Шмитт.
Бош прокурорнинг қўшимча қилишича, Хитой ҳукумати коронавирус хавфи ҳақида бутун дунёга ёлғон маълумот берган ва касаллик тарқалишининг олдини олиш бўйича керакли чораларни кўрмаган. Айблов материалларига кўра, Хитой ҳукумати 23 январга қадар COVID-19 тарқалишига йўл қўймаслик учун бирор чора кўрмаган. Масалан, Уханда 16 январь куни 40 минг киши иштирокида тадбир ўтказилган.
Шмиттнинг таъкидлашича, хитойлик амалдорлар касаллик тарқалишини яшириб, индивидуал ҳимоя воситалари захираларини яратиб олган.
Аввалроқ АҚШ президенти Дональд Трамп Пекинни коронавирусга оид фактларни яширгани учун жавобгарликка тортишга ваъда берган эди.
Мавзуга доир:
