Қирғизистонда коронавирус билан касалланганлар сони 612 кишига етди

Қирғизистонда ўтган бир сутка ичида коронавирус билан касалланиш бўйича яна 22 та ҳолат қайд этилди. Бу ҳақда мамлакат Соғлиқни сақлаш вазирлигига таяниб, «Kloop.kg» хабар берди.

Касалланиш бўйича сўнгги ҳолатлар қуйидаги ҳудудларда аниқланган:

• Бишкек — 10;
• Чуй вилояти — 2;
• Ўш шаҳри — 4;
• Ўш вилояти — 1;
• Жалолобод вилояти — 4;
• Норин вилояти — 1 та.

Шундай қилиб, мамлакатда COVID-19 билан касалланганларнинг жами сони 612 кишини ташкил этмоқда. Касалликка чалиниш ҳолатлари, асосан, Ўш вилоятида қайд этилган — 151 киши. Ундан кейинги ўринда Бишкек (133 киши) ва Жалолобод вилояти (109 киши) жойлашган.

Қирғизистон Соғлиқни сақлаш вазирлигининг маълум қилишича, ўтган бир сутка ичида коронавирус аниқланган 38 бемор даволанишга муваффақ бўлган. Ҳозирда стационарларда 351 бемор даволанмоқда, улардан 5 нафари жонлантириш бўлимида.

Қирғизистонда пандемия бошланганидан буён 7 киши COVID-19 қурбонига айланди. Ҳозирга қадар 254 даволанишга муваффақ бўлган.

Ўзбекистонда 22 апрель соат 10:00 ҳолатига кўра, коронавирус инфекциясини юқтириб олганлар сони 1692 кишига етди. Мамлакатда 15 мартдан буён коронавирусга чалинган беморларнинг олти нафари вафот этди, 357 нафари эса соғайиб, реабилитацияга олинган. Хорижда камида 73 ўзбекистонликда коронавирус аниқланган (энг кўпи — 42 нафари Россияда), уларнинг тўрт нафари вафот этгани маълум қилинган.