Нефтга боғлиқ тарихдаги энг йирик фалокатлар. Улар орасидан Мингбулоқ нефть кони ҳам ўрин олган (фото)

2010 йил 20 апрель куни Мексика кўрфазидаги АҚШнинг ҳудудий сувларида Deepwater Horizon нефть платформасида портлаш содир бўлган эди. Оқибатда 780 минг тоннадан ортиқ нефть океанга оқиб кетган. Бу АҚШ тарихидаги энг йирик экологик фалокатлардан бири ҳисобланади. «Коммерсантъ» ушбу фожиа ва нефтнинг оқиб кетишига оид бошқа ҳолатларни тўплаб тақдим этди.

Тарихда нефть тўкилишига оид энг йирик ҳолатлардан бири Калифрония штатидаги «Лейквю» нефть фонтанида содир бўлган. Авария оқибатида 1,2 миллион тоннадан ортиқ нефть тўкилган, фонтан 18 ой давомида — 1910 йилнинг мартидан, 1911 йилнинг сентябрига қадар отилиб турган. Фалокат янада кўпроқ экологик оқибатларни юзага келтириши мумкин эди, бироқ ишчилар атрофни ўраб чиқиб, нефтнинг Буэна-Виста кўлига етиб боришига йўл қўймаган.

1991 йилнинг яварида Кувайтни истило қилган ироқликлар Форс кўрфазига 820 минг тоннадан ортиқ нефтни тўкиб юбориб, 600 километрга яқин қирғоқни ифлослантирган.

Шунингдек, 700 та нефть қудуқлари ёқиб юборилгани сабаб саҳрода 300 та нефть кўллари пайдо бўлган. Кувайтнинг ўша вақтдаги умумий зарари 170 миллиард долларга баҳоланган.

Кўрфаздаги нефть доғининг ўлчами 160х68 километрга етган, айрим ҳудудларда тўкилган нефть қалинлиги 13 сантиметрни ташкил этган. Кўлни «қуритиш» учун 10 йилга яқин вақт кетди.

2010 йилнинг 20 апрель санасида Deepwater Horizon нефть платформасида портлаш содир бўлди.

Портлаш оқибатида 780 тоннадан ортиқ нефть океанга тўкилган.

Океан ресурсларидан фойдаланиш, уларни мувофиқлаштириш ва назорат қилиш бюросининг тергов натижаларига кўра, мазкур фожиага VR минорасини ижарага олган ҳамкор ва пудратчилар — Transocean ва Halliburton жавобгар.

Фалокатнинг АҚШ иқтисодиётига етказган зарари 145,9 миллиард долларга баҳоланган бўлиб, асосан, туристик ва балиқчилик соҳасига зиён етган. VR компенсация тўлаш ва тўкилган нефть оқибатларини бартараф этишга 61,6 миллиард доллар сарфлаган.

Нефть доғининг ўлчамлари 169х72 километрга етган. Нефть Луизиана, Миссисипи, Алабама, Техас ва Флоридага қадар етиб борган. Минглаб ҳайвонлар ҳалок бўлган.

2004 йилдан 2019 йилга қадар Тaylor Energy нефть минорасидаги авария оқибатида Мексика кўрфазига 490 минг тоннадан ортиқ нефть оқиб кетган. Нефть платформаси 2004 йили «Иван» тўфони оқибатида вайрон бўлган ва нефтнинг оқаётгани узоқ вақт эътиборсиз қолган. Жамоатчилик бу ҳақда 2010 йилда, Deepwater Horizon авариясини тадқиқ этиш вақтида, хабар топган.

1979 йилда Pemex компаниясига қарашли Ixtоc I нефть платформасида портлаш содир бўлган. Нефть оқими орадан тўққиз ой ўтгач тўхтатилган, бу вақт ичида Мексика кўрфазига 460 минг тоннадан ортиқ қора олтин оқиб кетган. Етказилган умумий зарар 1,5 миллиард долларга тенг.

1976 йилдан 1996 йилга қадар Нигер дельтасида 4,8 мингдан ортиқ кўнгилсиз ҳодисалар содир бўлган ва бунинг оқибатида 328 минг тоннадан ортиқ нефть сувга оқиб кетган.

Нигер дельтасига нефть оқишига, асосан, Shell компанияси жавобгар бўлган. Бугунги кунда дельтанинг ҳудуди дунёдаги энг ифлосланган жойлардан бири ҳисобланади.

1979 йилнинг июлида Кариб денгизида Atlantic Empress вa Aegean Captain танкерлари ўртасида тўқнашув содир бўлган ва бунинг оқибатида 290 минг тонна нефть оқиб кетган.

1978 йилнинг мартида Франциянинг Бретани қирғоқлари яқинида Американинг Аmоcо Cаdiz танкери саёзликка чиқиб қолган. Оқибатида 220 минг тонна нефть сувга оқиб кетган, қирғоқнинг 300 километри ифлосланган.

1992 йилнинг 2 март куни Ўзбекистоннинг Мингбулоқ туманидаги нефть конида бурғулаш қудуғининг чуқурлиги 5237 метрга етганда нефть оқиб чиқа бошлаган. Оғзига ўрнатилган 700 атмосфера босимга мўлжалланган превентор ёпилганда, босим зўрлигидан ёрилиб кетган. Шундан кейин мисли кўрилмаган «нефть фонтани» отила бошлаган. Маълумотларга кўра, 285 минг тоннадан ортиқ нефть оқиб кетган.

1989 йилнинг мартида Eххоn Vаldez компаниясининг танкер Аляска қирғоқларида фалокатга учраган. Денгизга 40 минг тоннадан ортиқ нефть тўкилиб, 2 минг километр қирғоқни ифлослаган. Компания маҳаллий ҳудудни тозалашга, компенсация тўлаш ва суд жараёнларига 3,8 миллиард доллар сарфлаган.

1994 йилнинг августида Коми шаҳридаги (Россия) «Коминефть» компаниясига тегишли нефть қувурида содир бўлган авария оқибатида 14 минг тонна нефть оқиб кетган.

2002 йилнинг ноябрида Испания қирғоқларида Prestige танкери ҳалокатга учраган. Денгизга 64 минг тонна мазут оқиб кетган. Фалокат етказган жами зарар 4 миллиард еврога баҳоланган. Шундан сўнг Европа Иттифоқи бир корпусли танкерларнинг ўз сувларига киришини тақиқлаб қўйган.