АҚШда Мишель Обама янги вице-президент бўлишини истовчилар кўпайди

АҚШ демократик партияси вакилларининг кўпчилиги партия вакили Жо Байден шу йили бўлиб ўтадиган сайловларда янги президент сифатида сайланадиган бўлса, мамлакатнинг собиқ биринчи хоними Мишель Обаманинг вице-президент лавозимини эгаллашини истамоқда. Бу ҳақда Politico хабар берди.

Нашрнинг ёзишича Обама сиёсатчилар орасида ҳам, Америка фуқаролари орасида ҳам катта обрўга эга. Мишель демократик партиянинг асосий юлдузларидан бири, YouGov 2019 йилда ўтказган сўровномада актриса Анжелина Жолини ортда қолдириб мамлакатдаги энг ҳурматли аёл деб топилган. Шунингдек, АҚШ собиқ президенти Барак Обаманинг рафиқаси ўтган йили 10 миллион нусхада сотилган мемуарлар туфайли мамлакатнинг энг кўп гонорар олувчи ёзувчиларидан бири сифатида эътироф қилинган.

Байден ҳам бир неча марта Обаманинг вице-президент бўлишини хоҳлаши ҳақида гапирган. Бироқ Politico нашрининг қайд этишича, собиқ биринчи хоним Байден штаби муҳокама қилаётган номзодлар рўйхатига киритилмаган, сабаби аёлнинг ўзи сиёсий фаолиятга қизиқмаслигини билдирган.

Обама хоним ўз мемуарларида ҳам АҚШ вице-президенти бўлишни истамаслигини ёзган ва ҳозир ҳам ушбу аҳдидан қайтмаганини таъкидламоқда.

Мишелнинг маслаҳатчиси, турмуш ўртоғи,  АҚШнинг 44-президенти Барак Обаманинг дўсти Валери Жарретт нашрга берган интервьюсида сайловолди жараёнларда иштирок этиш собиқ биринчи хонимга ёқмаслигини айтиб ўтди. Жарретт Обаманинг Байденни қўллаб-қувватлаши, бироқ сиёсатда ўзини бу қадар олий ўринда кўрмаётганлигини таъкидлади. Барак Обаманинг бошқа бир маслаҳатчиси Дэвид Аксельрод эса Мишелнинг сайловолди жараёнларда Байден билан бирга иштирок этишидан ҳайратланиши мумкинлигини қайд этган. Унинг қўшимча қилишича, собиқ биринчи хоним сиёсатда ҳаваскор бўлган, гарчи бошқа одамлар учун яхшилик қилишга уринган бўлса ҳам бошқарувга интилмаган ва сиёсатдаги кўпчиликка хос тарзда иккиюзламачилик қилмаган.17 апрелда Байден Оқ уйда ўзи билан бирга ишлаши мумкин бўлган номзодлар жамоасини тузаётгани маълум бўлганди. Сиёсатчи жамоасига кимлар киргани ва кимга қайси лавозим мўлжал қилинаётганига аниқлик киритмаган. Байден аввалроқ ҳукуматда вице-президентлик ўрнида аёл раҳбарни кўришни исташини айтганди.