Ижтимоий тармоқларда, хусусан, Telegram каналлари орқали кийимига ва сўзларига қараганда тиббиёт ходими бўлган, аммо ўзини таништирмаган аёлнинг қисқа видеоси тарқалган. Видеода шифокор ёки ҳамширалигини пайқаш қийин бўлган бу аёл «беморларининг аҳволи оғирлиги»ни айтиб, ўз яқинларига «розилик сўраш» маъносида йиғлаб мурожаат қилади. Соғлиқни сақлаш вазирлиги Жамоатчилик билан алоқалар бўлими бошлиғи Фурқат Санаев ушбу видео юзасидан расмий изоҳ берди.

Фото: «Kun.uz»

«Шу кунлардаги вазиятдан келиб чиқиб, кўпчиликнинг хаёлига биринчи навбатда коронавирусга чалинган беморлар келиши табиий. Аммо аёлнинг либоси тиббиёт ходимлариники бўлса-да, махсус кийимлар эмас, яъни аксарият коронавирус юқтирган беморлар сақланаётган вирусология илмий текшириш институти ходимлариникидан кескин фарқ қилади. Қолаверса, бу муассасанинг ходимларидан кимдир шундай хато йўл тутишига ишониш қийин.

Шуни маълум қиламизки, видеодаги аёл вирусология илмий текшириш институти ходими эмас.

Ҳозир айни шу масала бўйича суриштирув олиб борилмоқда ва тўлиқ маълумот бўлиши билан хабар берамиз. Аммо дастлабки хулосалар бўйича айтиш мумкинки, айнан бу аёл вирусология илмий текшириш институтида шифокор ёки ҳамшира бўлиб ишламайди. Ушбу масалага институт раҳбарияти томонидан ҳам аниқлик киритилди. Аёлнинг ўзи ҳам қайси шифохонанинг қайси беморлари оғир аҳволда эканлигини аниқ айтмаган. Бу тиббиёт ходими қаерда ишлаши ҳақида суриштирувлар олиб боряпмиз.

Энг муҳими, коронавирусга чалинган беморлар сони ва уларнинг аҳволи ҳақида мунтазам ахборот бериб келинмоқда ва эҳтиросларга берилган ҳолда аҳоли орасида саросима чиқаришга ҳожат йўқ, бунинг учун қонунчиликда жавобгарлик ҳам белгиланган.

Эслатиб ўтаман, бу ҳозирча дастлабки хулосалар ва аниқ ахборот, қўшимча янгилик бўлиши билан эълон қиламиз», — дейилади ССВ матбуот котиби Telegram’даги каналида ёзган постда.

Аввал Қашқадарёда карантин қоидаларини бузган икки чойхоначи ва бир «қочоқ» жаримага тортилгани ва Сурхондарёда коронавирус ҳақида ёлғон маълумот тарқатган шахсга 1 миллион сўмдан ортиқ жарима белгилангани ҳақида хабарлар берилган.