Яккабоғдан мурожаат: «Бор ўтинни ёқиб бўлдик. Газ ‘заправка’га ўзимиз чиқайлик десак — карантин»

Қашқадарё вилоятининг Яккабоғ тумани «Хонақа» маҳалла фуқаролар йиғини Чўянли қишлоғида истиқомат қилувчи Сайёра Арзиеванинг «Дарё»га маълум қилишича, у яшайдиган ҳудудга суюлтирилган газ баллонлари салкам икки ойдан бери етказиб берилмаяпти.

«Бор ўтинни ёқиб бўлдик. Овқат пиширишда, кундалик турмушда газсизликдан қийналяпмиз. Ўзимиз ‘газ-заправка’га чиқиб келайлик десак — карантин», — дейди мурожаатчи. Аҳоли ҳолат юзасидан маҳалла раисига ҳам бир неча бор шикоят қилган. «Раис туман газ идорасига мурожаат қилганини, натижа чиқмаётганини айтди», — дея қўшимча қилди Сайёра Арзиева.

Яккабоғ тумани марказидан 20—25 километр масофада жойлашган, Қизилқишлоқ, Чўянли ва Хонақа қишлоқларини бирлаштирувчи «Хонақа» маҳалла фуқаролар йиғини раиси Нодир Бозоров билан боғланиш имкони бўлмади. Яккабоғ тумани газ идораси раҳбари Шерматилла Михлиев эса Чўянлига охирги марта газ баллонлари 48 кун аввал олиб борилганини тан олди.

«Сиз айтаётган ҳудудга 24 март куни газ баллонларини етказишимиз керак эди, аммо байрам сабаб бу иш ортга сурилди. Бугун, 25 март куни ходимларимиз газ баллонларни олиб, ўша қишлоққа кетган. Тез орада қишлоқдаги 852 хонадон суюлтирилган газ билан таъминланади», — деди Михлиев «Дарё» мухбири билан суҳбатда.

Айни вақтда, «Дарё»га шикоят қилган мурожаатчининг қўшимча қилишича, 25 март куни соат 19:00 га қадар қишлоққа суюлтирилган газ баллонлари етказилмаган.