Тошкент шаҳар ИИББ енгил автомобиллар нархини ошириш масаласи кўриб чиқилаётгани ҳақида хабар эълон қилингач, интернет тармоғида норозилик билдириш учун тўпланишга чақирган фуқароларни қидирмоқда. Бу ҳақда идора матбуот хизмати хабар берди.

Фото: «Дарё»

«Ҳурматли ҳамюртлар! Сиздан иғвогар чақириқларидан таъсирланмасликни ва фақатгина қонун доирасида ҳаракат қилишингизни сўраймиз», — дейилади хабарда.

Маъмурий жавобгарлик тўғрисидаги кодекснинг 201-моддасига кўра, йиғилишлар, митинглар, кўча юришлари ёки намойишлар уюштириш, ўтказиш тартибини бузиш – базавий ҳисоблаш миқдорининг олтмиш бараваридан (14 316 600 сўм) саксон бараваригача (19 088 800 сўм) миқдорда жарима солишга ёки ўн беш суткагача муддатга маъмурий қамоққа олишга сабаб бўлади.

Таъкидланишича, ҳозирги вақтда мазкур чақириқларни тарқатаётган шахснинг фаол қидируви олиб борилмоқда.

Мавзуга доир:

Эслатиб ўтамиз, UzAuto Motors компанияси 9 март куни ўзи ишлаб чиқараётган (йиғаётган) енгил автомобиллар нархи модел ва модификацияга қараб 3 фоиздан 21 фоизгача оширган эди. Нархларнинг бу қадар кескин ошиши халқ орасида кескин норозиликларни келтириб чиқармоқда. Ҳатто Истеъмолчилар ҳуқуқларини ҳимоя қилиш федерацияси UzAutoMotors’нинг автомашиналар нархини оширганини кескин қоралаб чиқди. 13 март куни Ўзбекистон Президенти Шавкат Мирзиёев Хоразм вилояти фаоллари билан учрашувда автомобиллар нархи оширилганини танқид қилган.