«Ўзавтосаноат» раҳбари UzAuto Motors’нинг ваъдаларини бажарган ёки бажармаганига аниқлик киритди

«Ўзавтосаноат» компанияси раиси Шавкат Умурзоқов «Gazeta.uz» нашрига берган интервьюсида UzAuto Motors енгил автомобиллар нархининг оширилиши ҳақида сўз юритиб, «ишлаб чиқарувчининг машина таннархини тушириш юзасидан берган ваъдаларини бажарганлигини» таъкидлади.

Шавкат Умурзоқов ўзи компанияда иш бошлагунига қадар 2018 йил июнь ойида UzAuto Motors’нинг қарзи қарийб 500 миллион АҚШ долларига етгани, автомобилларнинг айрим моделлари зарарга ишлаб чиқарилгани ва ҳар биридан қарийб 1000 доллар зарар кўрилганини қайд этган.

«Қаерда эски нархларни сақлаб қолиш имкони бор бўлган бўлса биз уларни сақлаб қолдик. Компания шунчаки фойда кўришни истаганида нархлар 3—20 фоизга эмас, балки 40 ва ундан кўпроқ фоизга ошарди», — дея енгил автомобилларнинг нархи ошганига муносабат билдирган Умурзоқов.

Унинг сўзларига кўра, ўтган давр мобайнида автомобилларнинг таннархига бир нечта факторлар таъсир кўрсатган:

• 2017 йилда доллар курсининг оширилгани — Spark, Nexia ва Cobalt таннархлари 22,2 фоизга, Lacetti ва Damas эса —14,3 фоизга қимматга тушган;
• Комплектация деталларини транспортировка қилиш тарифлари 6,7 фоизга ошган;
• Коммунал хизматлар учун тўловлар 9,7 фоизга ошган ва бу ўзбек сўмида ҳисоблаганда автомобиллар таннархини 0,2 фоизга қимматлаштирган;
• Комплектация транспортировка учун тарифлар нархининг 6,7 фоизга ошгани сўмга нисбатан олганда таннархни 0,3 фоизга оширган.

Шавкат Умурзоқовнинг айтишича, нархлар ишлаб чиқаришни модернизациялаш ва харажатларни оптимизация қилиш ҳисобига ушлаб турилган. 2018 йил якунларига кўра, маҳсулотнинг таннархи 936 миллиард сўмга (7,7 фоиз), 2019 йилда эса — 814 миллиард сўмга (6,6 фоиз) туширилган, 2020 йил учун прогноз — 1,2 триллион сўм бўлиши кутилмоқда.

«2017—2018 йилларда компания айрим автомобиллар реализациясини 3—17 фоиз зарар ҳисобига амалга оширган, қарз миқдори эса валюта алмаштириш курсидаги қарийб икки баравар имтиёзга қарамай 500 миллион долларни ташкил қилган. Ўшанда нархларни 7,7 фоизга ошириб, 2018 йил август ойида таннархни тушириш ҳисобига ўз харажатларини қоплашга ўтиб, ҳаражатларни оптимизация қилишга эришдик», — дейди «Ўзавтосаноат» раҳбари.

«Lacetti нима учун 3 фоизга қимматлашди? Чунки биз ушбу автомобиль нархини 2018 йилда ошириб бўлганмиз. Қолган маркаларнинг каттароқ фоизга қимматлашганининг сабаби эса ўша вақтда уларнинг нархи оширилмганида», — деди Умурзоқов.

Шавкат Умурзоқов компаниянинг автомобиллар нархини тушириш бўйича берган ваъдасини бажаргани, долларда уларнинг нархи курс ўзгарганидан кейин арзонроқ бўлганлигини қайд этган.

Чакана савдо нархлари бозор курсига қараб ҳисобланган. 4 март куни UzAuto Motors Spark ва Damas нархини 10—21 фоизга, Nexia’ни 15−19,4 фоизга, Cobalt’ни 10−14,7 фоизга ва Lacetti’ни 3 фоизга оширган, бироқ бу ҳақда 11 март куни эълон қилган. Бунгача ишлаб чиқарувчи автомобиллар нархларини 2017 йилда (Spark, Nexia ва Cobalt) ҳамда 2018 йил август ойида (Lacetti, Damas ва Malibu) оширган.

Умурзоқов мисол тариқасида ўзбек сўмининг 2017 йил сентябрдаги девалвациясидан кейин Cobalt (LT) нархи 83,9 миллион сўм (10 752 АҚШ доллари) бўлганини, 2018 йил август ойида автомобилнинг нархи 84,2 миллион сўм (10 722 АҚШ доллар) деб белгиланганини айтган. ҚҚС имтиёзлари бекор бўлгач, 2019 йил октябрь ойида Cobalt йўл фонди маблағлари ҳисобига 87,1 миллион сўм (9 252 АҚШ доллар) нархланган. 4 мартдан белгиланган нарх 95,8 миллион сўм (10 070 АҚШ доллар) ва 2017 йилдаги нархдан 682 долларга арзонроқ, — дейди «Ўзавтосаноат» раиси.

Nexia 3 (LT МТ) 2017 йил сентябрь ойида 73,2 миллион сўм бўлган (9389 доллар). 2018 йил август ойида нарх 73,7 миллион сўм бўлди (9391 доллар), 2019 йил октябрда машина (йўл фонди маблағлари ҳисобига) 75,9 миллион сўмга (8069 доллар) сотилган. Янги нарх 87,3 миллион сўм (9182 доллар) 2017 йилдагидан 207 долларга арзон.

LS M/T комплектациясидаги Spark нархи 2017 йил билан таққослаганда 580 долларга арзонроқ, LT A/T эса 275 долларга қимматроқ нархланган. 2018 йил билан таққослаганда Malibu’нинг барча комплектациялардаги нархи 305 доллардан 5262 долларгача арзонлашган, Lacetti эса 1642−1868 долларга арзонлашган. Damas нархи 223−230 долларга қимматлашган, Labo эса 495 долларга арзонлашган.

«Биз ваъдамизнинг устидан чиқдик ва ваъдамизни бажаришда давом этяпмиз. Автомобилларнинг таннархини арзонлаштириб, ҚҚС тўлаш мажбуриятини ўз зиммамизга олганмиз (ҚҚС имтиёзлари бекор қилингач UzAuto Motors автомобиллар нархларини оширмагани назарда тутилган). Ушбу факторларга қарамай биз давлат бюджетига даромад келтирган барқарор компанияга айлана олдик», — деб ҳисоблайди Шавкат Умурзоқов.

Шунингдек, «Ўзавтосаноат» раҳбари Chevrolet’нинг бошқа хориж давлатларида ишлаб чиқариладиган моделларини Ўзбекистондаги машиналар билан таққослади. Унинг сўзларига кўра, Spark Мексикада 11—14 минг доллар, Ўзбекистонда эса — 7—9 минг доллар, Бразилияда Cobalt — 15—16 минг доллар Ўзбекистонда — 10—12 минг доллар, Nexia 3 Мисрда тахминан 12 минг доллар атрофида, Ўзбекистонда эса — 9—11 минг долларга сотилмоқда.

Шавкат Умурзоқов компания кадрлар сиёсатидаги ўзгаришлар ҳақида ҳам гапирди. Хусусан, соҳага хорижлик мутахассислар жалб қилингани, савдо тизимида коррупцияга қарши курашилгани, автомобилларни етказиб бериш муддатлари қисқаргани, ишлаб чиқариш ҳажмининг ошганини алоҳида таъкидлаган.