O‘zbekiston iste’molchilar huquqlarini himoya qilish federatsiyasi rasmiy saytida ichki bozorda avtomobil narxlari ko‘tarilishiga munosabat bildirildi.

Foto: “Daryo”

“Bugungi kunda iste’molchilar avtomashinalar narxlari ko‘tarilganidan norozi. Bir yoki ikki foizga emas, birdaniga 15-20 foizga! Nima sababdan? Qaysi omillar tufayli? Nega aynan xaridorgir bo‘lgan avtomashinalarning narxi tushish o‘rniga ko‘tarilib ketgani ko‘pchilik iste’molchilarning noroziligiga sabab bo‘lmoqda. Berilgan va’dalar aksincha edi.

Bu yil avtomashina narxi tushishi kutilayotgan edi. Bu ish bilan UzAutoMotors iste’molchilar ustidan yana bir “ahmoqona yurish qildi”. O‘zbekiston Iste’molchilar huquqlarini himoya qilish jamiyatlari federatsiyasiga 2019-yil davomida yuzga yaqin rangi o‘chganidan tortib, o‘z joyida turgan, hech qanday tashqi omillarsiz o‘z-o‘zidan yonib ketgan mashinalar to‘g‘risida arizalar kelib tushgan.

Biz nizomda belgilangan tizim orqali iste’molchilarimizga ko‘mak ko‘rsatgan bo‘lishimizga qaramasdan, muammolar ko‘paysa ko‘paydiki, aslo kamaymadi. UzAutoMotors monopol tashkilot hisoblanar ekan, bu kabi muammolarning adog‘i bo‘lmasligi aniq.

To‘g‘ri, xalqimiz mehnatkash, orzu-havas uchun ham mashina olish ishtiyoqidan aslo qaytmaydi. Lekin bu degani istalgancha xalq bilan hisoblashmasdan narxlarni oshirish kerak degani emas! Bu ketishda xalqimiz ancha payt musofir yurtda “qora ishchi” degan tamg‘a bilan yurishga mahkum.

To‘g‘ri-da, o‘z davlatida qadr topmagan xalqni o‘zga yurtda boshini silarmidi?! Qachongacha o‘zga yurtda yaratilgan imkoniyatlarga havas qilib yuramiz? Qachonki, UzAutoMotors’dan tashqari yana raqobatdosh zavodlar ish boshlasa, shundagina narxning tushishidan umid bor. Aks holda xalqqa nisbatan bunday bepisand va tahqirlovchi kayfiyat hali-beri ularni tark etmaydi”, — deyiladi munosabatda.

Federatsiya iste’molchilarni ham o‘z haq-huquqlarini himoya qilishga chaqiradi:

“Gapimiz nihoyasida iste’molchilarimizdan shuni iltimos qilardikki, qo‘yilgan bahoga ko‘nib ketavermang. Yurtboshimiz ham ‘Jamiyat — islohotlar tashabbuskori’ deb bekorga aytmagan. Xalq manfaati o‘ylanmas ekan, uni talab qilish huquqiga to‘laqonli haqlimiz. Xalqdek qudratli kuch bo‘lmaydi’.

UzAuto Motors kompaniyasi 9-mart, dushanba kuni, o‘zi ishlab chiqarayotgan (yig‘ayotgan) yengil avtomobillar narxi model va modifikatsiyaga qarab 3 foizdan 21 foizgacha oshirgan edi. Kompaniya ushbu holatni “narxlarni qayta ko‘rib chiqish qarori narxlar konyunkturasi, shuningdek, ichki va tashqi bozordagi umumiy makroiqtisodiy vaziyatning o‘zgarishi bilan bog‘liq”, deb izohladi.

Avvalroq Oliy Majlis Qonunchilik palatasi deputati Maqsud Qurbonboyev UzAuto Motors mutasaddilaridan avtomobil narxlarining oshirilishi yuzasidan tushuntirish so‘rab, “Narxlar qaysi omillar tufayli oshganini iste’molchi bilishga haqi bormi yoki yo‘qmi?”, deb aytgandi.