Озарбайжонда коронавирус билан касалланган бемор вафот этди. Бу мамлакатда коронавирус туфайли кузатилган биринчи ўлим ҳолати ҳисобланади. Озарбайжон Вазирлар Маҳкамаси ҳузуридаги тезкор штаб хабарига кўра, Эрондан ватанига қайтган ва карантинга жойлаштирилган озарбайжонлик аёл коронавируснинг мамлакатдаги биринчи қурбонига айланган. Бу ҳақда «РИА Новости» хабар берди.
Фото: «РИА Новости»
«Аёлда коронавирус инфекцияси аломатлари аниқланган ва у карантинга жойлаштирилганди. Афсуски аёлнинг ҳаётини сақлаб қолишнинг иложи бўлмади», — дейилган хабарда.
12 март ҳолатига кўра, Озарбайжонда коронавирус инфекциясини юқтириб олган фуқаролар сони 15 нафарга етган. 10 март, сешанба куни, Озарбайжон ҳукумати мамлакатда Наврўз байрами тадбирларини оммавий тартибда ўтказишни бекор қилган. Озарбайжонда коронавирус сабабли барча ОТМ ва мактаблар вақтинча ёпилган.
Мавзуга доир:
Шунингдек, оммавий тадбирлар бошқа МДҲ давлатларида ҳам коронавирус сабаб ўтказилмайди. Жумладан, Қозоғистонда аввалига 8 март байрамига бағишланган концерт, кейинчалик турли оммавий тадбирлар, Ўзбекистонда Tashkent Law Spring иккинчи юридик форуми ҳамда зиёрат туризми ҳафталиги каби халқаро тадбирларнинг ўтказилиши бекор қилинган.
