Қирғизистон Республикаси бош вазири Муҳаммадкали Абилғозиев мамлакатда коронавирус тарқалишининг олдини олиш мақсадида оммавий тадбирлар ўтказишни тақиқлаш бўйича қарор имзолади. Бу ҳақда Қирғизистон ҳукумати матбуот хизматига таяниб, «РИА Новости» хабар бермоқда.
Вазирлар Маҳкамасининг таъкидлашича, ушбу қарор коронавирус инфекцияси хавфининг олдини олиш ва аҳолининг санитария-эпидемиологик фаровонлигини таъминлаш мақсадида қабул қилинди.
Қайд этилишича, фармонда савдо, хизмат кўрсатиш ва умумий овқатланиш соҳасида фаолият юритувчи жисмоний ва юридик шахсларга белгиланган вақтинчалик чеклов олиб ташлангунга қадар оммавий тадбирларни ўтказмаслик ва уларда иштирок этишдан воз кечиш, шунингдек, хоналар ва катта залларга санитария-техник воситалар ва ҳаво тозалаш мосламаларини жойлаштириш тавсия этилган.
Соғлиқни сақлаш вазирлигининг маълумотларига кўра, Қирғизистон ҳудудида коронавирус билан касалланиш ҳолати аниқланмаган. 500 нафардан ортиқ киши шифокорлар назорати остида. Мамлакатда инфекция аниқланиши эҳтимолига қарши республика штаби тузилган. Мамлакат Хитой билан чегарани вақтинча ёпган. Бошқа чегара давлатлардан келувчилар тана ҳароратини ўлчаш мосламалари билан текширилмоқда. Вирус тарқалган мамлакатлардан келганлар икки ҳафта давомида карантинга юборилади.
Аввалроқ Озарбайжонда коронавирус сабаб Наврўз байрами тадбирлари бекор қилингани, Қозоғистонда ҳам оммавий тадбирлар ўтказиш тақиқланиб, мактаб ўқувчилари таътилга эртароқ чиқадиган бўлгани хабар берилганди.
Изоҳ (0)