Қирғизистон ҳукумати коронавирус қайд этилган давлатларга борган хорижлик фуқаролар ва фуқаролиги бўлмаган шахсларнинг мамлакат ҳудудига киришини чеклади. Бу ҳақда Ўзбекистон Ташқи ишлар вазирлиги хабар берди.
Вазирликнинг маълум қилишича, Ўзбекистоннинг Бишкек шаҳридаги элчихонасига Қирғизистон Ташқи ишлар вазирлигининг нотаси келиб тушган.
Мазкур нотага кўра, 2020 йил 1 мартдан бошлаб сўнгги 30 кун ичида COVID-19 коронавируси билан касалланишнинг ўсиши ва унинг тарқалиши кузатилаётган давлатларга борган хорижий фуқаролар ва фуқаролиги йўқ шахсларнинг Қирғизистон давлат чегарисидан ўтказиш пунктлари орқали ушбу мамлакатга кириши учун вақтинчалик чекловлар жорий қилинган. Мазкур чекловлар мамлакат ҳукумати қарори асосида амалга киритилган.
Қайд этилишича, ноқулай эпидемиологик ҳолат кузатилаётган давлатлар рўйхати Қирғизистон Соғлиқни сақлаш вазирлиги томонидан тасдиқланади ва мунтазам янгиланиб борилади.
Шу сабабли Ўзбекистон ТИВ мамлакат ҳудуди орқали Қирғизистонга боришни режалаштирган Ўзбекистон ва бошқа давлатларнинг фуқароларидан Қирғизистон ҳукуматининг юқорида айтиб ўтилган қарорини ҳисобга олишни сўрайди.
Шунингдек, Қирғизистон ҳудудида бўлиб турган Ўзбекистон фуқаролари зарур ҳолатларда Бишкек шаҳридаги элчихонага +996312986296 телефон рақами орқали мурожаат қилиши мумкинлиги маълум қилинган.
Аввалроқ Қирғизистонда коронавирус хавфи сабабли оммавий тадбирлар ва спорт мусобақалари бекор қилинган эди.
Мавзуга доир: Соғлиқни сақлаш вазирлиги коронавирус сабабли Олмалиқда фуқаролар вафот этгани ҳақидаги хабарни рад этди
Ўзбекистон Президенти Шавкат Мирзиёев 11 март, чоршанба куни, коронавирусга қарши кураш бўйича Соғлиқни сақлаш вазирлигига топшириқлар берди ҳамда мазкур вирус ҳақида гапирди.
ЖССТ 11 март куни коронавируснинг пандемия даражасига етганини маълум қилди. Мазкур ташкилот вакили эса коронавируснинг Ўзбекистонга кириб келиши эҳтимоли юқори эканини билдирди. Россия Ўзбекистонга коронавирусни аниқлайдиган тест тизимини юборди.
Изоҳ (0)