Нью-Йорк штати суди продюсер Харви Вайнштейнни зўрлаш ва жинсий зўравонликда айбдор деб топиб, 23 йилга озодликдан маҳрум қилди. Бу ҳақда «Коммерсантъ» хабар бермоқда.
Бир вақтлар Голливуднинг энг қудратли ва нуфузли шахсларидан бири бўлган 67 ёшли судланувчи суд залида каталкада пайдо бўлган — у март ойи бошларида юрак операциясини бошдан ўтказганди.
Жараён 6 январь куни бошланган. 24 февраль куни суд ҳайъати Вайнштейнни судда кўрилаётган 5 та ишнинг 2 тасида айбдор деб топди. Судланувчи эса айбини тан олмаган. Унинг адвокатининг айтишича, аёлларнинг ўзи карьерада кўтарилиш умидида у билан яқин алоқада бўлишга ихтиёрий равишда рози бўлган.
Хабарда айтилишича, Вайнштейнга қарши биринчи оммавий айбловлар 2017 йил октябрида The New York Times ва New Yorker газеталарида Miramax ва The Weinstein Company кино компаниялари ходимларига, шунингдек, у суратга олган фильмларда роль ўйнаган актрисаларга нисбатан узоқ муддатли жинсий зўравонлик қилгани ҳақидаги мақолалар эълон қилганида пайдо бўлган.
Шундан буён Вайнштейнни 80 дан ортиқ аёллар жинсий зўравонликда айблаган. Улар орасида Анжелина Жоли, Гвинет Пэлтроу, Ума Турман, Сальма Ҳайек ҳам бор. У ишдан олинган, компанияси эса банкрот деб эълон қилинган.
Вайнштейнга қарши расмий айблов 2018 йил май ойида эълон қилинган бўлиб, у Нью-Йорк полициясига таслим бўлган. Нью-Йоркда Вайнштейнга қарши суд бошланганидан кейин Лос-Анжелес прокуратураси ҳам янги айбловларни илгари сурган. Энди у Лос-Анжелес судида ҳам жавоб бериши керак. Шунингдек, Лондонда ҳам унга қарши жиноий тергов олиб борилмоқда.
Изоҳ (0)