Хитойда коронавирус сабабли миллионлаб компаниялар ёпилиши мумкин

Хитойда миллионлаб ўрта ва кичик компаниялар коронавирус сабабли ёпилиши мумкин, деб ёзмоқда Forbes.

Қайд этилишича, мамлакатдаги бизнеслар ўз фаолиятини тўхтатишга мажбур бўлмоқда ва компаниялар жиддий йўқотишларга дуч келган. Банклар эса кредитларни тўлаш муддати ва шартларини истар-истамас қайта кўриб чиқмоқда.

Хитой компанияларининг учдан бир қисмида бир ойлик фаолиятини таъминлаш учун, бошқа учдан бир қисмида эса икки ойга етарли маблағ қолган. Бу ҳақда Bloomberg томонидан февраль ойида Хитойдаги бизнес бўйича ўтказилган сўровнома натижаларидан аниқланган.

Хабарда айтилишича, миллионлаб корхоналар ойликларни ҳисоблаш ва қарзларни ўз муддатида тўлаш учун жиддий ҳаракатлар қилишига тўғри келмоқда.

Шунингдек, қўшимча қилинишича, Хитой иқтисодиётининг 60 фоизи ва мамлакатдаги иш ўринларининг 80 фоизи хусусий бизнес ҳиссасига тўғри келади.

Bloomberg бир ойдан ортиқ вақт давомида 100 та салони ёпилган, 10 минг киши ишлайдиган йирик автодилерни бунга мисол қилиб кўрсатган. Тармоқ директори Бригитта компаниянинг заҳира маблағларини тугаётгани, банклар миллиардлаб юань қарзларни тўлаш муддатини узайтиришга бермаётганини айтган.

Хитой ҳукумати бизнес учун кредит олишни соддалаштириш чораларини кўрган: асосий ставкани пасайтирган ва банкларга кредит беришни кўпайтиришни ва компаниялар учун уларни олиш мезонларини юмшатишни буюрган. Аммо айрим корхоналар зарур молиявий маблағларни ололмаганини айтмоқда.

Хитойнинг энг йирик кредит берувчи саноат ва тижорат банки Хитойнинг бизнесига ёрдам бериш учун 5,4 миллиард юань (770 миллион доллар) ажратган.

Ҳозирда Хитойдаги асосий саноат тармоқлари бўйича корхоналар коронавирус тарқалиши шароитида ишлаб чиқаришни давом эттиришни бошлади, бироқ ҳали ҳам уларнинг ишини қийинлаштирувчи муаммолар мавжуд. Вирус туфайли Хитойнинг 300 та компанияси 8,2 миллиард АҚШ доллари миқдорида қарз олишни режалаштирмоқда.