Жиноят ишлари бўйича Урганч шаҳар суди 19 февраль куни журналист Давлатназар Рўзметовнинг ўлимига сабаб бўлган ҳайдовчи Умидбек Сапаров устидан ҳукм чиқарди. Бу ҳақда марҳумнинг яқин дўсти Умидбек Давлатовга таяниб, «Gazeta.uz» хабар берди.
Таъкидланишича, суд Умидбек Сапаровни 3 йилга озодликдан маҳрум қилиш жазосини тайинлаган.
Шунингдек, суд Умидбек Сапаровни 1,5 йилга транспорт воситасини бошқариш ҳуқуқидан маҳрум этган.
48 ёшли Давлатназар Рўзметов 2019 йил 6 ноябрь куни кечаси йўлни кесиб ўтаётганида йўл-транспорт ҳодисасига учраганди. Бошидан жароҳат олган журналист воқеа жойида вафот этган.
Аввалроқ Давлатназар Рўзметов ўлими бўйича воқеалар хронологияси эълон қилинганди.
Эслатиб ўтамиз, Давлатназар Рўзметов кейинги пайтларда ўзининг шов-шувли постлари ва танқидий мақолалари билан танилган эди.
У 2018 йилнинг октябрида Қўшкўпир туман ҳокимлиги биносида ўтказилаётган йиғилишга кириб, йиғилиш иштирокчиларини расмга олмоқчи бўлганида туман ҳокими ўринбосари йиғилишни тугади, деб эълон қилган. Кейинроқ журналистнинг ушбу қилмиши майда безорилик деб топилиб, у етти суткага қамалган эди. 2019 йилнинг 5 октябрь куни ҳам Давлатназар Рўзметовнинг ҳибсга олингани ҳақида хабарлар тарқалган, бироқ Бош прокуратура журналистнинг ҳибсга олинганини инкор этганди.
Изоҳ (0)