Москвадаги метро бекати олдида боласини ташлаб кетган ўзбекистонлик аёл уни болалар уйига жойлаштирмоқчи бўлгани аниқланди

Ўзбекистонлик аёл Москвадаги метро бекати ёнида ўзининг икки ойлик боласини ташлаб кетгани ҳақида хабар берилган эди.

RT’нинг ёзишича, икки ойлик боласини Москвадаги метро бекати олдида қолдириб кетган ўзбекистонлик аёл бунга қадар ўғлини болалар уйига жойлаштиришга уринган. Аёлнинг адвокати Александр Тимошенконинг айтишича, моддий жиҳатдан болани таъминлай олмаслиги сабабли аёл шундай қарорга келган.

Адвокатнинг сўзларига кўра, унинг мижози Мафтуна Каримова золим отасидан қочиб, Москвага келган ва у ерда ҳомиладор бўлиб қолган, шундан кейин боланинг отаси уни ташлаб кетган. Аёл фарзандини муддатидан олдин дунёга келтирган. Шундан кейин у дарҳол иш қидиришга тушган.

Қайд этилишича, ўзбекистонлик аёл ҳамма пулни ўғли учун ётоқ, овқат ва дори-дармонга сарфлаган. Адвокатнинг маълум қилишича, Мафтуна Каримова қўлидаги боласи билан қурилишда, балиқ дўконида ва дўконда ишлаган.

Адвокатнинг таъкидлашича, дастлаб Каримова ўғли туғилган касалхонадан ёрдам сўраб мурожаат қилган. Шифокорлар орқали у болани болалар уйига юбормоқчи бўлган. Бироқ аёл бунга муваффақ бўлмаган.

Қайд этилишича, чақалоқ доимо очликдан йиғлаган. Шундан сўнг, аёл дўстидан уни Москвага олиб боришни сўраган. У метрода, одамлар кўп жойда боласини ташлаб кетишга қарор қилган.

Аёл кузатув камераларида қайд этилган. Кўп ўтмай аёл шаҳар атрофида қўлга олинган. Ушбу ҳолат бўйича жиноий иш қўзғатилган. Мафтуна Каримова 12 апрелгача ҳибсда сақланади.

Эслатиб ўтамиз, 10 февраль, душанба куни, Тошкент шаҳар Чилонзор туманидаги «Совпластитал» корхонаси биноси орқасида, Бунёдкор кўчаси бўйлаб оқиб ўтадиган каналдан белига тош бойлаб ташлаб кетилган чақалоқ топилган эди.