Jinoyat ishlari bo‘yicha Urganch shahar sudi 19-fevral kuni jurnalist Davlatnazar Ro‘zmetovning o‘limiga sabab bo‘lgan haydovchi Umidbek Saparov ustidan hukm chiqardi. Bu haqda marhumning yaqin do‘sti Umidbek Davlatovga tayanib, “Gazeta.uz” xabar berdi.
Ta’kidlanishicha, sud Umidbek Saparovni 3 yilga ozodlikdan mahrum qilish jazosini tayinlagan.
Shuningdek, sud Umidbek Saparovni 1,5 yilga transport vositasini boshqarish huquqidan mahrum etgan.
48 yoshli Davlatnazar Ro‘zmetov 2019-yil 6-noyabr kuni kechasi yo‘lni kesib o‘tayotganida yo‘l-transport hodisasiga uchragandi. Boshidan jarohat olgan jurnalist voqea joyida vafot etgan.
Avvalroq Davlatnazar Ro‘zmetov o‘limi bo‘yicha voqealar xronologiyasi e’lon qilingandi.
Eslatib o‘tamiz, Davlatnazar Ro‘zmetov keyingi paytlarda o‘zining shov-shuvli postlari va tanqidiy maqolalari bilan tanilgan edi.
U 2018-yilning oktabrida Qo‘shko‘pir tuman hokimligi binosida o‘tkazilayotgan yig‘ilishga kirib, yig‘ilish ishtirokchilarini rasmga olmoqchi bo‘lganida tuman hokimi o‘rinbosari yig‘ilishni tugadi, deb e’lon qilgan. Keyinroq jurnalistning ushbu qilmishi mayda bezorilik deb topilib, u yetti sutkaga qamalgan edi. 2019-yilning 5-oktabr kuni ham Davlatnazar Ro‘zmetovning hibsga olingani haqida xabarlar tarqalgan, biroq Bosh prokuratura jurnalistning hibsga olinganini inkor etgandi.
Izoh (0)