Ўзбекистонда 2020 йил бошидан буён юз берган ЙТҲларда 147 киши ҳалок бўлди

Ўзбекистон ҳудудида 2020 йилнинг 18 февраль кунига қадар содир бўлган йўл-транспорт ҳодисалари оқибатида 147 киши ҳалок бўлди. Бу ҳақда Ўзбекистон Ички ишлар вазирлиги Йўл ҳаракати хавфсизлиги бош бошқармаси хабар берди.

Маълум қилинишича, 2019 йилнинг мос даврига нисбатан содир этилган ЙТҲлар сони 10,5 фоизга ёки 656 тадан 587 тага, уларда вафот этганлар сони 16,1 фоизга ёки 168 нафардан 147 нафарга, тан жароҳати олганлар сони 4,2 фоизга ёки 597 нафардан 572 нафарга камайган.

Қайд этилишича, бу каби нохуш ҳолатларнинг барвақт олдини олиш мақсадида Йўл ҳаракати хавфсизлиги бош бошқармаси раҳбарияти томонидан ишлаб чиқилган 29 та устувор йўналиш бўйича профилактик-амалий чора тадбирлар белгиланиб, уларнинг кунлик ижроси бўйича назорат қилиб бориш йўлга қўйилган.Сўнгги кунларда Ўзбекистонда одам ўлими билан якунланган бир қанча ЙТҲ юз берди. Хусусан, Андижонда Nexia ва «Зил» иштирокида юз берган ЙТҲда 2 киши, Nexia ва Spark иштирокида даҳшатли ЙТҲда эса Spark ҳайдовчиси қурбон бўлган. Қорақалпоғистонда Matiz ва MAN юк машинаси иштирокидаги ЙТҲ 4 кишининг умрига зомин бўлган бўлса, Бухорода Nexia иштирокидаги ЙТҲ оқибатида 2 киши ҳалок бўлган. Тошкент шаҳар Чилонзор туманида юз берган ЙТҲда 1 киши қурбон бўлган ва 5 киши жароҳатланганди. Сергелида эса Lacetti йўл четидаги 3 нафар пиёдани уриб кетиб, уларнинг ўлимига сабаб бўлган. Фарғонада 3 та машина иштирокида юз берган ЙТҲда 3 киши ҳалок бўлди.