Хитойлик эркак бозорда 15 сония ичида коронавирусга чалинди
Хитойнинг Нинбо шаҳрида яшовчи эркак бозорга келгач, 15 сония ичида коронавирус юқтириб олган. Бу ҳақда Daily Mail нашри хабар қилди.
Маълумотларга кўра, 56 ёшли эркак 23 январь тонгида бозорга келган. Расталар орасидан юраётган вақтида 15 сония давомида коронавирус билан хасталанаган 61 ёшли аёл билан тўқнаш келган. Эркак инфекция юқтириб олганини 4 февраль куни билган ва унга қадар иккита супермаркет ва битта ресторанга бориб одамлар ҳаётини хавф остига қўйган.
Хитойликлар ушбу вируснинг қандай қилиб бундай қисқа вақт оралиғида одамдан одамга юққанини аниқлагани ҳақида қўшимча маълумот берилмаган. Эркакни текширган шифокорлар унинг ушбу ҳолатга қадар коронавирус юқтирган ҳайвонлар ва одамлардан узоқда бўлганини қайд этган.
Аввал Хунан вилоятидаги шифокор 10 кун кетма-кет автойўлдаги ҳайдовчи ва йўловчилар ҳолатини текшириб, коронавирусга чалингани ва юрак тўхташи оқибатида ҳалок бўлгани хабар қилинганди. Унинг ўлимига кучли чарчоқ сабаб бўлгани айтилган.
Сўнгги маълумотларга кўра, 2019-nCoV вирусига чалинган одамлар сони Хитойнинг ўзида 28 минг нафардан ошган, касаллик туфайли 565 нафар одам ҳаётдан кўз юмган.
