АҚШнинг Time журнали ўзининг навбатдаги сони муқовасига тиббий ниқоб таққан Хитой президенти Си Цзиньпиннинг портретини жойлаштирди. Бу ҳақда «РБК» хабар берди.
Журналда эълон қилинган мақолага кўра, 2019-nCoV коронавирусининг тарқалиши натижасида юзага келган инқироз Хитой жамиятининг ва сиёсий ҳокимиятнинг ҳаддан ташқари марказлашувидан келиб чиққан мамлакатни бошқариш тизимининг мўртлигини кўрсатди.
Time журналистининг ёзишича, коронавирус тарқалиши Си Цзиньпиннинг Хитой асри ҳақидаги орзуларини йўққа чиқариши мумкин.
TIME’s new cover: The coronavirus outbreak could derail Xi Jinping’s dreams of a Chinese century https://t.co/f7CaZ74iv4 pic.twitter.com/sd7UOSyL8Q
— TIME (@TIME) February 6, 2020
Мақолада қайд этилишича, Си Цзиньпин ҳокимиятининг кучи ҳозирда Мао Цзэдун давридан бери мамлакат бошқарган ҳар қандай етакчисининг кучидан устун. У ўзи раҳбарлик қилаётган партияга аҳолининг содиқлиги асосида Хитойга буюкликни қайтариш учун («Хитойни яна буюк қилиш» учун) ҳамма нарса қилишга тайёр. Бироқ Time’да таъкидланишича, коронавирус эпидемияси ушбу тизимнинг заифлигини кўрсатди, чунки касалликка қарши кураш нафақат янги касалхоналарни нолдан бошлаб бир неча кун ичида қуриш қобилияти, балки бошқарув тизимининг ишончлилиги ва мослашувчанлигини ҳам талаб қилади.
«Бу Си Цзиньпин томонидан яратилган ‘юқоридан пастга’ бошқарув тизимининг очиқ томони: юқоридан буйруқлар олинмагунча, ҳеч ким ҳеч нарса қилмади», — дейилади Time мақоласида. Шунингдек, мақолада Хитойдан келадиган маълумотларга ишонч йўқлиги таъкидланади. Расмий маълумотларга кўра, коронавирусдан ўлим даражаси атиги 2 фоизни ташкил этади. Бу оддий гриппдан бироз кўпроқ ва Эбола иситмаси (50 фоиз) ёки атипик пневмониядан (10 фоиз) анча паст.
Мақола муаллифининг қайд этишича, Хитой ўзида ишончсизлик қўрқувини кучли ғазабга айлантириши мумкин. 2019 йил охирида эпидемия бошланган Ухань шаҳри аҳолиси Хубэй провинциясида яккаланиб қомоқда. Бироқ Хитойнинг қолган қисмида, барча Хубэй провинцияси аҳолиси шу аҳволга тушмоқда. Ижтимоий тармоқларда ўз қишлоқларини бегоналардан ҳимоя қилишга тайёр қуролланган одамларнинг видеолари тарқалмоқда. Ҳатто Пекинда ҳам кўп қаватли биноларнинг қўриқчилари Хубэйдан келганларга, шу жумладан, уйни ижарага олганларга ҳам уйга киришга рухсат бермаяпти. Эпидемия ўчоғига айланган Хубэй провинциясидан келганларга хизмат кўрсатилмаяпти, бу эса жанжалларни келтириб чиқармоқда.
Аввалги йилларда Time Си Цзиньпиннинг суратини уч марта ўз муқовасига жойлаштирган. 2012 йил октябрь ойида, яъни Си Цзиньпин Хитой коммунистик партияси марказий қўмитаси бош котиби ва ХХР раиси этиб сайланиши арафасида, у журнал муқовасида «Озод бўлмаган дунёнинг кейинги раҳбари» сифатида пайдо бўлган. 2014 йил ноябрь ойида у «Император Си», 2016 йил апрелда эса «Раис Си» сифатида журнал муқовасидан жой олган.
Аввалроқ Хитой раҳбари Си Цзиньпин вазиятни мураккаб деб атаган ва Жаҳон соғлиқни сақлаш ташкилотига коронавирусни енгишга ваъда берган.
Изоҳ (0)