Коронавирусдан даволаниб, касалликдан фориғ бўлганларда уни яна қайта юқтириб олиш хавфи мавжуд. Бу ҳақда хитойлик шифокор Чжань Цинюань маълум қилди, деб ёзмоқда Daily Mail.
Шифокорнинг айтишича, тузалиб кетган беморларда қайтадан касалликка чалиниш хавфи мавжуд. Шу сабабли, улар барча ҳимоя чораларини кўриши керак.
Шифокорнинг сўзларига кўра, вирус одам организмига тушганда, касалликка қарши курашга ёрдам берадиган антитаналар инсон танасида ишлаб чиқарилади, бу касалликни енгишга ёрдам беради. Бироқ вақт ўтиши билан антитаналар сони камаяди ва тананинг вирусга қарши курашиш қобилияти заифлашади. Бундан ташқари, шифокорнинг таъкидлашича, вируслар одатда бир нечта штаммларга эга ва улардан бирига қаршилик кўрсата оладиган одам барибир бошқаларга нисбатан заиф бўлиши мумкин.
Шу билан бирга, хитойлик экспертнинг ҳамкасблари унинг баёнотини танқид қилган ва коронавирус билан қайта касалланиш эҳтимоли жуда паст эканлигини таъкидлаган. Эдинбург университети иммунологи Пол Дигарднинг таъкидлашича, бугунги кунга қадар коронавирус аниқлангандан буён мутацияга учрамаган, шунинг учун, бу вирус билан касалланган инсоннинг танаси қайта касалланишдан етарли даражада ҳимояланган бўлади.
Эксетер университети доктори Бхарат Панкханиянинг маълум қилишича, Чжаннинг хавотирлари қанчалик асосли эканлигини айтиш қийин. Ҳали ҳам коронавирус ҳақида кўп нарса маълум эмас. Беморларнинг аксарияти вирусни қандай юқтиргани номаълум, уларнинг касалликлари қандай кечиши, тикланиш учун қанча вақт кераклиги ва касалликнинг қайталаниши мумкинлиги ҳақида маълумот йўқ. Мутахассиснинг қўшимча қилишича, инсон танаси вирусларни аниқ таний олади ва уларга қарши муваффақиятли курашади.
Аввалроқ Хитойнинг етакчи эпидемиологи Ли Ланьцзюань бошчилигидаги тадқиқотчилар гуруҳи (2019-nCoV) коронавирусга қарши курашда ютуққа эришганини эълон қилди. Шунингдек, Хитой коронавирусга қарши 3 йилдан бери мавжуд бўлган дорига патент олмоқчи эканлиги маълум қилинди.
Тошкентдаги дорихоналарда эса ниқобларнинг дефицити кузатилмоқда, баъзи дорихоналарда кунига 700 дона ниқоб сотилмоқда. Ўзбекистон дорихоналарида эса тиббий ниқоблар нархи 500 сўмдан 5000 сўмгача ошди.
Эслатиб ўтамиз, 6 февраль ҳолатига кўра, коронавирус қурбонлари сони 500 кишидан ошди.
Изоҳ (0)